Бир неше айдан берли “Бес баслама олимпиадасы” шеңберинде өткерилип атырған спорт жарыслары даўам етпекте.
Улыўма билим бериў мәкемелериниң муғаллимлери арасында “Саламат денеде – сапалы билим” сүрени астында “Кәсиплик аўқамы кубоги” спорт жарысларының Қарақалпақстан Республикасы басқышы өткерилди.
Өзбекстан кәсиплик аўқамлары Федерациясының Қарақалпақстан Кеңеси, Қарақалпақстан Республикасы мектепке шекемги ҳәм мектеп билимлендириўи министрлиги, Спорт министрлиги ҳәм Өзбекстан жаслар ислер агентлиги Қарақалпақстан Республикасы басқармасы тәрепинен тастыйықланған қоспа қарарға муўапық өткерилген “Кәсиплик аўқамы кубоги” спорт жарысларының Қарақалпақстан Республикасы басқышы Нөкис қаласы 2-санлы спорт мектеби, Әжинияз атындағы Нөкис мәмлекетлик педагогикалық институты, Бердақ атындағы Қарақалпақ мәмлекетлик университети ҳәм Олимпия ҳәм паралимпия спорт түрлерине таярлаў орайында болып өтти.
Илажда тийисли тараў басшылары, тараўлық кәсиплик аўқамлары кеңеслериниң баслықлары, жуўаплы шөлкемлестириўшилери ҳәм тийисли министрликлердиң ўәкиллери қатнасты.
Жарыста өткен басқышларда жеңимпаз болған 17 командада, жәми 357 муғаллим-устазлар спорттың ғалабалық түрлери болған киши-футбол, шахмат, шашка, стол тенниси ҳәм волейбол түрлери бойынша өз-ара күш сынасты. Бул жарыслардың өткен басқышларында улыўма билим бериў мәкемелериниң 15 мыңнан аслам хызметкерлери қатнасқан еди.
Күн даўамында спорт жарыслары қызғын өтип, тәжирийбели төрешилер тәрепинен баҳаланып барылды.
Жеңимпазлар анықланып стол тенниси бойынша ҳаял-қызлар арасынан Тақыятас районынан Юлдуз Худайбергенова биринши, Нөкис қаласынан Гүлхумар Сатимова екинши, Әмиўдәрья районынан Эътибор Бобожонова үшинши орынды, ал ерлер арасында болса, Елликқала районынан Ихтиёр Қурбанов биринши, Әмиўдәрья районынан Дониёр Юлдашев екинши, Мойнақ районынан Нурлыбай Қылышбаевлар үшинши орынларды ийеледи.
Спорттың шахмат түринен ҳаял-қызлар арасынан Шымбай районынан Гүлсәўир Бекмуратова биринши, Хожели районынан Гүлназ Абдижамилова екинши, Қараөзек районынан Жәмийла Ҳамидуллаева үшинши, ал ерлер арасында болса, Тақыятас районынан Рустем Қайпанов биринши, Нөкис қаласынан Саламат Дилимбетов екинши, Қоңырат районынан Баҳадыр Туреев үшинши орынды ийеледи. Ал, спорттың шашка түри бойынша ҳаял-қызлар арасынан Қоңырат районынан Дильфуза Уразбаева биринши, Қараөзек районынан Әлийма Тәңирбергенова екинши, Нөкис қаласынан Гүлжәҳән Мамутова үшинши, ерлер арасынан Қоңырат районынан Баҳадыр Абдиреймов биринши, Әмиўдәрья районынан Амин Ешимбетов екинши, Шымбай районынан Рустем Абдиғаниев үшинши орынды ийеледи.
Спорттың волейбол түринен Нөкис қаласы командасы биринши, Беруний районы командасы екинши, Тахтакөпир районы командасы үшинши, сондай-ақ, киши футболдан Нөкис районы командасы биринши, Кегейли районы командасы екинши, Нөкис қаласы командасы үшинши орынды ийелеп, жеңимпаз деп табылды.
– Мен Елликқала районында жасайман. Үш жылдан берли райондағы 13-санлы улыўма билим бериў мектебинде денетәрбиясы сабағынан оқыўшыларға сабақ беремен. Бос ўақытларымда турақлы түрде спорттың стол тенниси менен шуғылланаман. Мектебимизде де оқыўшы балаларды усы спорт түрине қызықтырыў мақсетинде жарыслар, спорт ойынларын шөлкемлестирип киятырман. Бес баслама шеңберинде улыўма билим бериў мектеплериниң хызметкерлери арасында шөлкемлестирилип киятырған жарысларда өткен жылы да қатнасып, стол тенниси бойынша былтыр биринши орынды ийелеген едим. Быйылғы жарыста да төрт қарсыласымды жеңип, биринши орынды алыўға миясар болдым. Бул жарыслар муғаллимлердиң де спортқа қызығыўына, денетәрбиясы менен шуғылланыўына үлкен жәрдем береди, деп есаплайман,-дейди жеңимпаз Ихтиёр Қурбанов.
“Саламат денеде – сапалы билим” сүрени астында “Кәсиплик аўқамы кубоги” спорт жарысларының Қарақалпақстан Республикасы басқышында командалық есапта 1-орынды Нөкис қаласының, 2-орынды Тақыятас районының, 3-орынды Қоңырат районының командалары ийелеп, жеңимпаз деп табылды.
Улыўма командалық есапта биринши орынды ийелеп жеңимпаз болған Нөкис қаласы командасына “Кәсиплик аўқамы кубоги” ҳәм
30 миллион сум ақшалай сыйлық тапсырылды.
Сондай-ақ, Өзбекстан кәсиплик аўқамлары Федерациясының Қарақалпақстан Кеңеси тәрепинен ҳәр қыйлы номинациялар бойынша жеңимпазларға, жеңимпаз командаларға диплом ҳәм Қарақалпақстан Республикасы Спорт министрлигиниң саўғалары тапсырылды.
Ә.Жийемуратов,
Қарақалпақстан хабар агентлиги