Пайтахтымыздағы Халықаралық конгресс орайында Президент Шавкат Мирзиёевтиң қатнасыўында үшинши Ташкент халықаралық инвестициялық форумы даўам етпекте.
Президент бүгинги конференция глобаллық геосиясий ҳәм экономикалық машқалалар ҳәўиж алып атырған, турақлы раўажланыў жолында қәўип-қәтерлер күшейип атырған дәўирге туўра келип атырғанын атап өтти.
Дүнья тәртип-қағыйдаларында терең трансформация процесслери болып өтпекте. Товар ҳәм хызметлерди жеткерип бериў шынжырларындағы үзилислер, халықаралық саўданың төменлеўи, инвестициялық ағымлардың азайыўы, климат апатшылықларының күшейиўи – жағдай қаншелли турақсыз ҳәм әззи екенин айқын көрсетпекте.
Дүнья жүзи экономикасының өсиў пәтлери кейинги үш жыл даўамында төменлемекте. Тиккелей сырт ел инвестицияларына байланыслы тенденциялар да күтилген үмитлерди ақламай атыр.
– Әлбетте, биз бүгин дүнья жүзи инвесторлары ушын бурын көрилмеген дәрежеде гүрес жүргизилип атырғанын жақсы түсинемиз. Бирақ биз өзгермейтуғын ҳақыйқат барған сайын ашық-айдынласпақта. Ҳеш бир мәмлекет бундай қыйын машқалаларды жеке тәртипте шеше алмайды. Өз-ара исеним ҳәм ҳүрмет руўхы, бир-бирин қоллап-қуўатлаў принципи узақ мүддетли бирге ислесиўдиң беккем тийкары болып қала береди, – деди Президент.
ӨзА