Бурын хабар еткенимиздей, республикамызда “Жаслар ҳәм бизнести қоллап–қуўатлаў жылы”на бағышланған дәстүрий “Сүўретлеў ҳәм әмелий көркем өнер фестивалы” ҳәптелиги болып өтпекте.
Ҳәптелик даўамында Нөкис қалалық Есжан бақсы атындағы 1-санлы балалар музыка ҳәм көркем-өнер мектеби «Сүўретлеў ҳәм әмелий көркем өнери бөлими оқыўшылары көргизбесиниң ашылыўы ҳәм Өзбекстан Художниклери дөретиўшилик бирлеспеси ағзалары, Қарақалпақстан халық художниги, академик Сарсенбай Байбосынов ҳәм Қарақалпақстан Республикасына мийнети сиңген жаслар устазы Абдулла Ражаповлар менен ушырасыў кешеси, сондай-ақ шеберлик сабағы болып өтти.
Екинши күни Қарақалпақстан Республикасына хызмет көрсеткен көркем өнер ғайраткери, Қарақалпақстан халық художниги Б.Айтмуратов жеке галереясының ашылыўы, Нөкис қаласындағы қәнигелестирилген мәденият ҳәм қөркем өнер мектебинде Өзбекстан Художниклери дөретиўшилик бирлеспесине ағза художниклер менен шеберлик сабағы ҳәм мектеп оқыўшылары көргизбесиниң ашылыў мәресими өткерилди. Үшинши күни Өзбекстан Художниклери дөретиўшилик бирлеспесине ағза художниклер ҳәм Бердақ атындағы Қарақалпақ мәмлекетлик университети сүўретлеў өнери қәнигелиги студент-жаслары, Нөкис қәнигелестирилген мәденият мектеби, Ж.Изентаев атындағы Қарақалпақстан Республикасы қәнигелестирилген көркем өнер мектеп-интернаты оқыўшылары менен биргеликте Кегейли районы Актуба аўыл пуқаралар жыйынына пленэрге шықты. Бүгин Бердақ атындағы Қарақалпақ мәмлекетлик университетинде Өзбекстан Художниклери дөретиўшилик бирлеспесине ағза художниклер менен шеберлик сабағы ҳәм университет студентлери көргизбесиниң ашылыў мәресими, Нөкис қалалық 22-санлы балалар музыка ҳәм көркем өнер мектебинде Өзбекстан Художниклери дөретиўшилик бирлеспесине ағза художниклер менен ушырасыў кешеси ҳәм шеберлик сабағы болып өтти.
Ҳәптелик шеӊбериндеги илажлар даўам етпекте.
Қарақалпақстан хабар агентлиги