Орайлық Азия халықаралық институты директоры Жавлон Ваҳобов Душанбе қаласына әмелге асырған әмелий сапары шеӊберинде Тәжикстан Республикасы Президенти жанындағы Стратегиялық изертлеўлер орайы басшысы Хайриддин Усмонзода менен ушырасты.

Дәслеп тәреплер Өзбекстан ҳәм Тәжикстан арасындағы дослық қатнасықты жоқары баҳалап, бирге ислесиўди және де раўажландырыў еки мәмлекеттиӊ мәплерине сәйкес келетуғынын атап өтти. Усы көзқарастан, Хайриддин Усмонзода өз-ара пайдалы бирге ислесиўди раўажландырыў ҳәм беккемлеўде туўысқан мәмлекетлер басшыларыныӊ ролин әҳмийетли деп атады.

Ушырасыўда, сондай-ақ, еки мәмлекеттиӊ эксперт ҳәм аналитикалық жәмийетлериниӊ арасында өз-ара бирге ислесиўди және де беккемлеў әҳмийетли екени айрықша атап өтилди. Атап айтқанда, Орайлық Азия халықаралық институты ҳәм Тәжикстан Республикасы Президенти жанындағы Стратегиялық изертлеўлер орайы тәрепинен Душанбе қаласында еки мәмлекет жетекши илимий-изертлеў ҳәм аналитикалық структуралары ўәкиллериниӊ қатнасыўында әнжуман шөлкемлестириў мәселесине айрықша итибар қаратылды.

Атап өтилгениндей, бул илаждыӊ акуталлығы мәмлекетлер күн тәртибиниӊ әҳмийетли  мәселелери бойынша бирден-бир тоқтамға келиў ҳәм бирге ислесиўдиӊ жаӊа бағдарларын белгилеў зәрүрлиги менен белгиленеди.

Сөйлесиў жуўмағында аналитикалық орайлардыӊ басшылары институт ҳәм орайдыӊ 2024-жыл ушын Ҳәрекетлер режесине қол қойды. Ҳүжжетте өз-ара сапарлар шөлкемлестириў, экспертлердиӊ еки мәмлекет аналитикалық орайлары тәрепинен өткерилетуғын халықаралық әнжуманларда қатнасыўы, жоқары дәрежедеги ушырасыўлар ҳәм сөйлесиўлер алдынан еки тәреплеме мәсләҳәтлесиўлер өткериў ҳәм усы арқалы илимий-изертлеў тараўындағы бирге ислесиўди және де тереӊлестириў нәзерде тутылған.

Б.ХУДОЙБЕРДИЕВ, ЎзА