Өзбекстанның Ирандағы елшиси Фариддин Насриев басшылығындағы мәмлекетимиз делегациясы Тегеранда өткерилген Экономикалық бирге ислесиў шөлкемине (ЭБШ) ағза мәмлекетлер турақлы ўәкиллериниң 286-мәжилисинде қатнасты, деп хабар бермекте «Дүнья» МА хабаршысы.

Мәжилисте бир қатар әҳмийетли мәселелер, соның ишинде, 2023-жыл 9-ноябрь күни Ташкентте өткерилген ЭБШ 16-саммитинде Өзбекстан Президенти тәрепинен алға қойылған басламалардың орынланыўы додаланды.

Илаж шеңберинде «Шахрисабз қаласы 2024-жылы ЭБШ туризм пайтахты» деп тән алынғаны мүнәсибети менен усы жылдың 25-27-апрель күнлери Шахрисабзда өткерилетуғын илажлар кестеси көрип шығылды.

Өзбекстан елшиси Фариддин Насриев қатнасыўшыларға мәмлекетимиз басшысы тәрепинен Экономикалық бирге ислесиў шөлкеми шеңберинде алға қойылған басламалардың мазмун-мәниси ҳаққында айтып берди ҳәм оларды турмысқа енгизиў әҳмийетли екенин атап өтти.

Ушырасыўда, сондай-ақ, ЭБШ шеңберинде регионлараралық ҳәм көп тәреплеме бирге ислесиўди раўажландырыў ҳәм бул бағдарда биргеликте илажларды әмелге асырыў мәселелери ҳаққында да пикир алысты.

Қарақалпақстан хабар агентлиги