Бердақ атындағы Қарақалпақ мәмлекетлик университетинде Қубла Кореяның YOUNG IN SN CO., Ltd hám KBSI (Korean Basic Science Institute) ўәкиллеринен ибарат делегация ағзалары менен ушырасыў шөлкемлестирилди.
Оған университет ректоры А.Реймов, илимий ислер ҳәм инновациялар бойынша проректоры И.Турдымамбетов, химия-технология факультетиниң деканы Б.Нурымбетов, биология факультетиниң деканы Я.Аметов ҳәм халықаралық бирге ислесиў бөлиминиң хызметкерлери қатнасты.
Қубла Кореядан келген мийманлар университет ректораты тәрепинен жыллы жүзлилик пенен күтип алынды.
Буннан соң, тәреплер арасында биргеликтеги жаңа жойбарларды әмелге асырыў, оны раўажландырыў, илимий изертлеў ҳәм лаборатория имканиятларын кеңейтиў мәселелери бойынша сөйлесиўлер алып барылды.
Сөйлесиўлер даўамынды университет ректоры А.Реймов Бердақ атындағы Қарақалпақ мәмлекетлик университети ҳәм оның илимий-изертлеў тараўындағы жетискенликлери ҳаққында қысқаша айтып өтти.
Өз гезегинде Қубла Кореялы мийманлар да өзлериниң биргеликте жойбарлар таярлаў ҳәм лабораториялар шөлкемлестириў бойынша ис-режелери менен усынысларын билдирди.
Рәсмий ушырасыў жуўмағында, тәреплер бирге ислесиў жойбарлары бойынша басланған жумысларды даўам еттириўге өз-ара келисип алды ҳәм келисим шәртнамасына қол қойды.
Қарақалпақстан хабар агентлиги