Бүгинги күнде миллий армиямыз қатарында физикалық ҳәм руўхый жақтан күшли ҳәр тәреплеме жетик мәрт ҳәм батыр азаматлардың ўатанымыз шегараларын қорғаўға өз үлесин қосып атырғаны ҳәм жигитлик миннетин өтеўи ушын мүддетли әскерий хызметке таяр жас жигитлердиң ғайратын көриў қуўанышлы жағдай, әлбетте.
МҚХ шегара әскерлери қатарына әскерий хызметке шақырылған мүддетли әскерий хызметкерлердиң мәдений дем алыўын тәмийинлеў мақсетинде Нөкис қаласында жайласқан әскерий бөлимлердиң биринде Өзбекстан Республикасы филормониясы Қарақалпақстан Республикасы бөлими тәрепинен “Әлем нурға толсын сениң менен, Наўрыз!” атамасында концерт бағдарламасы шөлкемлестирилди.
Концерт бағдарламасында Қарақалпақстан Республикасына белгили көркем өнер ғайраткерлери, соның менен бирге, талантлы әскерлеримиз тәрепинен ўатансүйиўшилик руўхындағы қосықлар атқарылып, илаж көтериңки руўхда өтип, әскерлерге жақсы кейпият бағышлады.
Илаж жуўмағында филармония ҳәм театр хызметкерлери әскерий бөлим командири тәрепинен алғыснамалар менен сыйлықланды.
– “Әлем нурға толсын сениң менен, Наўрыз!” атамасындағы усындай илаж әскерий бөлимлердиң биринде, яғный «Жаслық» елатлы пунктинде жасаўшы жаслардың мәдений дем алыўын тәмийинлеў мақсетинде де шөлкемлестирилди,-дейди МҚХ шегара әскерий бөлиминиң баспасөз хаткери Ҳ.Қдырбаева.
Онда Ташкент қаласынан келген белгили сөз шебери Шерзод Баймурадов ҳәм хош ҳаўаз қосықшы Батыр Асқаровлар өзлериниң күлкили номерлери ҳәм концерт бағдарламалары менен қатнасты.
Олар тәрепинен атқарылған қосықлар ҳәм инсанға жақсы кейпият бағышлаўшы шығыўлар әскерий хызметкерлер ҳәм олардың шаңарақ ағзалары, жигитлик миннетин өтип атырған мүддетли әскерий хызметкерлерде үлкен тәсир қалдырды.
Ә.Жийемуратов,
Қарақалпақстан хабар агентлиги