Елимизде Наўрыз улыўма халықлық байрамына бағышланған руўхый-ағартыўшылық, мәдений илажлар басланып кетти.
Қарақалпақстан Республикасы педагогларды жаңа методикаларға үйретиў миллий орайы «Социаллық-экономикалық пәнлер методикасы» кафедрасы тәрепинен де улыстың уллы күни, шығыс халықларының жаңа жыл байрамы, жасарыў ҳәм жаңаланыў әййямы – Наўрыз улыўма халықлық байрамына бағышланған руўхыйлық илажы шөлкемлестирилди.
Руўхыйлық илажында кафедра профессор-оқытыўшылары ҳәм курс тыңлаўшылары тәрепинен таярланған шығыс календары бойынша жаңа жыл байрамының келип шығыў тарийхы, байрамның халқымыз турмысындағы орны ҳәм әҳмийети ҳаққында мазмунлы баянатлар тыңланды.
– Қатнасыўшыларды тынышлық, татыўлық ҳәм аўызбиршиликтиң белгиси болған Наўрыз әййямы менен қызғын қутлықлап, жақсы тилеклер билдирилди,-дейди З.Жақсымуратова.
Байрам илажында тарийх топары курсы тыңлаўшылары тәрепинен Наўрыз байрамының шырайына шырай, көркине-көрик қосатуғын ҳәм өзгеше мазмун бағышлайтуғын миллий үрип-әдет дәстүрлеримизди өзинде сәўлелендирген сахналық көринислер, миллий қосықлар, аяқ ойынлар атқарылды.
Қарақалпақстан хабар агентлиги