Усы жыл 14-февраль күни Ɵзбекстан Республикасының “Мəмлекетлик мүлкти меншиклестириў ҳаққында”ғы Нызамы қабыл етилип, онда рəсмий жəрияланған күннен баслап үш ай ɵткеннен кейин күшке кириўи белгилеп қойылды.

Бул нызамның мақсети, мəмлекетлик мүлкти меншиклестириў тараўындағы қатнасықларды тəртипке салыўдан ибарат. Усы нызамның 10-статьясына муўапық, меншиклестирилетуғын мəмлекетлик мүлк объектлерине мəмлекетлик кɵшпес мүлк объектлери, мəмлекет үлеслери (акциялар, үлеслер), мəмлекетлик унитар кәрханалар ҳəм мəмлекетлик шɵлкемлер киреди.

Ɵзбекстан Республикасы Мəмлекетлик активлерын басқарыў агентлиги мəмлекетлик мүлкти меншиклестириў тараўындағы ўəкилликли мəмлекетлик уйым есапланып, усы тараўдағы бирден-бир мəмлекетлик сиясатты əмелге асырады. Бағдарламаға муўапық мəмлекетлик мүлкти меншиклестириў жумысларын шɵлкемлестиреди, республика мүлкин сатыўшысы сыпатында ис жүргизеди, мəмлекетлик мүлктиӊ алды-сатты шəртнамаларға қол қояды.

Мəмлекетлик мүлкти меншиклестириў аукцион, таңлаў саўдалары, сɵйлесиў ɵткериўге ғалабалық шақырыў, бəсекиге тийкарланған сəўбет, биржа саўдалары, мəмлекетлик унитар кәрхананы ямаса шɵлкемди хожалық жəмийетиниң устав фондына (устав капиталына) мəмлекетлик үлес сыпатында киргизиў, мəмлекетлик үлеслерин ҳəм мəмлекетлик кɵшпес мүлк объектлерин хожалық жəмийетиниң устав фондына (устав капиталына) мəмлекетлик үлес сыпатында киргизиў, мəмлекетлик унитар кәрханасын ямаса мəмлекетлик шɵлкемлерди соңынан меншиклестириў шəрти менен ижараға бериў сыяқлы усыллардан пайдаланған ҳалда əмелге асырылады.

Жанат АЙМАГАНБЕТОВА,

Қарақалпақстан Республикасы ҳəкимшилик судыныӊ судьясы.

Қарақалпақстан хабар агентлиги