Беларусь Президенти Александр Лукашенко сегиз сырт мәмлекет елшилеринен исеним жарлықларын қабыллады. Бул ҳаққында «БелТА» хабар берди.

Мәмлекет басшысына исеним жарлықларын Өзбекстан, Әзербайжан, Қырғызстан, Түркия, Япония, Непал, Оман Патшалығы ҳәм Гвинея Республикасы елшилери тапсырды.

Лукашенко мәресим қатнасыўшыларына мүрәжат етип, соның ишинде, төмендеги пикирлерди билдирди:

– Биз қәўипсизликти сақлаў, әдалатлы дүньяны қурыў, ресурсларды әдил бөлистириў, мийнет нәтийжелилигин тәмийинлеў арқалы инсанлардың турмыс дәрежесин арттырыў мүмкин, деген принципке сүйенемиз. Бундай нәтийжеге тек ғана биргеликте ҳәрекет етиў арқалы ерисиў мүмкин. Тек тынышлық ҳәм турақлылықта ғана перзентлеримиз, ақлықларымыз ушын мүнәсип келешекти кепиллей аламыз.

Мәмлекет басшысының атап өтиўинше, мәмлекеттиң сыртқы сиясаты өз-ара ҳүрмет, тең ҳуқықлар ҳәм әдиллик принципине тийкарланғанын атап өтти. Беларусь бәрқулла ҳәр қандай мәселе бойынша бурынғысынан өзгеше тәризде ҳәмме менен пикирлесиўге таяр, келисиў нийетиндеги мәмлекетлер менен бирге ислесиўге болса айрықша итибар қаратады.

Дәстүрге бола, жетекши ҳәр бир елши менен мәмлекетлер арасындағы шериклик жағдайына қысқаша тоқтап өтти.

– Беларусь ушын Өзбекстан менен кең көлемли бирге ислесиў оғада айрықша әҳмийетке ийе, – деди Президент мәмлекетимиздиң Минскте жумыс баслаған Айрықша ҳәм толық ҳуқықлы елшиси Раҳматилла Назаровтан исеним жарлығын қабыллап атырғанда.

Александр Лукашенко жақында Ташкентте болып өткен қызғын қабыллаў, нәтийжели сөйлесиў ушын Өзбекстан Президенти Шавкат Мирзиёевқа терең миннетдаршылық билдирди.

– Сиз, елши мырза, Беларусьта ислеген ҳәм мәмлекетимизди жақсы билген инсан сыпатында жоқары дәрежеде ерисилген келисимлерди әмелге асырыўда бар имканиятларды, еки тәреплеме байланысты беккемлеў ушын билим ҳәм тәжирийбеңизди иске қосатуғыныңа исенимим кәмил.

Ғ.Хонназарова, ӨзА