Орайлық Азия халықаралық институты директоры Жавлон Ваҳобов Египет Араб Республикасыныӊ Өзбекстандағы Айрықша ҳәм толық ҳуқықлы елшиси Амира Фаҳмий менен ушырасыў өткерди. Сөйлесиў даўамында өз-ара бирге ислесиў перспективасы додаланды.

Сәўбет алдынан мәмлекетимиз басшысы Шавкат Мирзиёевтиӊ 2023-жыл февраль айында Каирға сапарынан соӊ ерисилген еки мәмлекет арасындағы бирге ислесиўдиӊ нәтийжели табыслары атап өтилди. Сол ўақытта түрли тараўлар бойынша шерикликти раўажландырыў ушын қолай щараят жаратыў, газ-химия, тоқымашылық, электротехника, зергерлик ҳәм фармацевтика санааты сыяқлы әҳмийетли бағдарларға өз-ара инвестиция тартыў бойынша келисимлерге ерисилген.

Сондай-ақ, мәдений-гуманитарлық байланысты тереӊлестириўде алдын ерисилген келисимлер үлкен әҳмийетке ийе екени атап өтилди. Араб тили бойынша қәниге таярлаў мақсетинде бирге ислесиўди раўажландырыў, сондай-ақ, усы жылы еки мәмлекеттиӊ ис-ҳәрекети менен арабтаныўшылар Глобал форумын шөлкемлестириў ҳаққында келисимге ерисилгени атап өтилди.

Әҳмийетли халықаралық ҳәм регионаллық машқалалар бойынша да пикир алысылды. БМШ, ИБШ, ШБШ сыяқлы халықаралық шөлкемлер шеӊберинде өз-ара қоллап-қуўатлаў дәстүрий түрге енгени атап өтилди.

Ушырасыў жуўмағында тәреплер улыўма регионаллық үстинликти алға қойыў мақсетинде илимий-изертлеў шөлкемлери арасында алмасыўды жеделлестириўге келисип алды. Дипломат ОАХИ ҳәм Египеттеги жетекши таллаў орайлары арасындағы бирге ислесиўди және де беккемлеўге жәрдем бериў ушын таяр екенин билдирди.

  Ғ.Хонназаров, ӨзА