Өзбекстан Республикасы Президенти “Санлы технологиялар халықаралық орайын шөлкемлестириў бойынша биринши гезектеги илажлар ҳаққында”ғы пәрманға қол қойды.

Оған муўапық, IT-парк аймағында санлы технологиялар тараўында өнимлер ислеп шығарыў ҳәм хызметлер көрсетиў ушын қолайлы шараятларға ийе болған арнаўлы аймақ сыпатында Санлы технологиялар халықаралық орайы (International Digital Technology Center – “ENTERPRISE UZBEKISTAN”) шөлкемлестириледи.

2024-жыл 1-июьннан баслап 5 жылға шекемги мүддетке Орайда сырт елли компаниялар ушын қолланылатуғын арнаўлы ҳуқықый режим эксперимент ретинде енгизиледи.

Орай аймағында төмендеги тараўларда арнаўлы ҳуқықый режим енгизиледи:

санлы технологиялар тараўында инновациялар, хызметлер ҳәм бизнес өнимлерин ислеп шығарыў ҳәм сынақтан өткериў бойынша “тәртипке салыў сәркардасы”н енгизиў;

бажыхана ҳәм салыққа тартыў;

мийнет қатнасықлары;

қаржы ҳәм банк жумысы;

шахсқа тийисли мағлыўматларды қайта ислеў ҳәм оларды қорғаў;

мәмлекетлик хызметлер көрсетиў;

интеллектуаллық мүлкти қорғаў;

коммерциялық ҳәм пуқаралық келиспеўшиликлерди көрип шығыў.

Санлы технологиялар министрлиги арнаўлы режимди енгизиў бойынша ўәкилликли уйым есапланады.

Санлы технологиялар министрлигине Орай аймағында сырт елли IT компаниялар ушын қолланылатуғын арнаўлы ҳуқықый режимди енгизиў мақсетинде төмендеги қосымша ўазыйпалар жүкленеди:

санлы технологиялар тараўында исбилерменлик ҳәм инвестиция жумысын әмелге асырыў ушын алдынғы халықаралық тәжирийбелерге тийкарланған қолайлы шараятлар жаратыў арқалы мәмлекетте санлы экономикаға инвестицияларды тартыўға жәрдемлесиў;

Дәстүрий өнимлер ҳәм мәлимлеме технологиялары технологиялық парки (IT-парк) резидентлери, сондай-ақ, басқа кәрханалар ҳәм шөлкемлер ушын консалтинг, ҳуқықый, қаржылай ҳәм басқа хызметлерди раўажландырыў;

кәрхана ҳәм шөлкемлердиӊ санлы технологиялары ҳәм хызметлери экспортын раўажландырыўды хошаметлеў ҳәм қоллап-қуўатлаў, олардыӊ сыртқы базарлардағы жумысын кеӊейтиўге жәрдемлесиў;

Орай аймағында заманагөй инфраструктураны раўажландырыў.

ӨзА