ФОТОРЕПОРТАЖ

Пайтахтымыздағы «Radisson Blu» мийманханасында Өзбекстан экологиялық ҳәрекети, Сенаттың Аралбойы регионын раўажландырыў мәселелери ҳәм экология комитети ҳәм Халықаралық суў ресурсларын басқарыў институты (IWMI) биргеликте ҳәм сырт ел экспертлери қатнасыўындағы «NEXUS Gains» бағдарламасы шеңберинде Арал теңизи бассейнинде илажлар бойынша халықаралық аўыл хожалығы изертлеўлери мәсләҳәт топарының семинары өткерилди.

Мәмлекетимизде экологиялық орталықты жақсылаў, қоршаған орталықты қорғаў, климат өзгериўиниң унамсыз ақыбетлерин жумсартыў бағдарында әмелге асырылып атырған жумыслар ҳаққында жәмийетшиликти хабардар етиў мақсетинде шөлкемлестирилген илажда мәмлекетлик ҳәм жәмийетлик шөлкемлер, миллий изертлеў институтлары, университетлер, халықаралық шөлкемлердиң ўәкиллери қатнасты.

Қатнасыўшылар инновациялық шешимлерди алға қойып, Арал теңизи бассейниниң турақлы раўажланыўына жәрдемлесиў бойынша өз пикирлерин билдирди. Бул бағдардағы изертлеўлердиң барысы ҳаққындағы жаңалықлары менен ортақласты. Изертлеў нәтийжелерин регионда қолланыў ҳәм бейимлестириў бойынша жойбарларды хошаметлеў, басламаның 2025-жылы басланыўы күтилип атырған келеси басқышлары ҳаққында сөз етилди.

Атап өтилгениндей, Халықаралық суў ресурсларын басқарыў институты Арал теңизи бассейнинде суў бөлистириўди моделлестириў ушын «PyWP» бағдарламасын әмелге асырып атырған болып, суўды ағызыў, сақлаў, гидроэнергетика симуляциясы ҳәм суўғарыў суўынан пайдаланыўды бақлаўдағы көп тәреплемеликти өзинде жәмлеген. Буннан тысқары, Халықаралық суў ресурсларын басқарыў институты гидрологиялық ис-ҳәрекетлерди түсиниў ушын Шыршық дәрьясының бассейнинде «CWAT» моделлестириўден пайдаланбақта. Сондай-ақ, Халықаралық суў ресурсларын басқарыў институты Ферғана ойпатында климаттың өзгериўи менен гүресиў ҳәм қурғақшылық қәўпи жүзеге келгенде суўға болған талапты қанаатландырыў ушын альтернатив суў сақлаў шешимлерин үйренбекте.

Семинар тараўда бирге ислесиўди раўажландырыў, тәжирийбе алмасыў ҳәм Арал теңизи бассейнинде экологиялық қәўип-қәтерге қарсы гүресиў, суў, энергия, азық-аўқат ҳәм қоршаған орталық тараўларында дус келип атырған қыйын машқалаларды шешиўши стратегияларды ислеп шығыўға хызмет ететуғыны менен айрықша әҳмийетке ийе болды.

Камола Юсупова, Носиржон Ҳайдаров (сүўрет), ӨзА