Нәшебентлик ҳәм психотроп қураллары инсан саламатлығына оғада үлкен унамсыз тәсир ететуғыны бәршемизге белгили. Бирақ, бундай қуралларды тутыныў ямаса алып-сатыў, рекламасы менен шуғылланыў жағдайлары азайып атырғаны жоқ. Нәшебентлик қуралларын интернет ямаса ғалаба хабар қуралларында реклама еткени ушын жуўапкершилик белгиленбегени себепли бундай жағдайлар көбейип бармақта.
Олий Мажлис Нызамшылық палатасындағы Өзбекстан Экологиялық партиясы фракциясының мәжилисинде нәшебентлик қураллары, олардың аналоглары ямаса психотроп қураллар, сондай-ақ, күшли тәсир етиўши ҳәм зәҳәрли қураллардың нызамға қайшы түрде айланысына қарсы гүресиўге қаратылған нызам жойбары биринши оқыўда көрип шығылды.
Атап өтилгениндей, бул нызам жойбары менен нәшебентлик қураллары, олардың аналоглары ямаса психотроп қуралларды телекоммуникация тармақлары ҳәм Интернет жәҳән мәлимлеме тармағынан пайдаланып, нызамға қайшы түрде айланысқа киргизгени, усы жынаятларды жас өспиримлерди тартқан ҳалда ислегени ушын жуўапкершилик илажлары күшейтилмекте.
Буннан тысқары, нәшебентлик қураллары, олардың аналоглары ямаса психотроп қураллар, күшли тәсир етиўши ҳәм зәҳәрли қуралларды өткериў мақсетин гөзлемей нызамға қайшы түрде алыў, сақлаў, тасыў ямаса жибериў ушын ҳәкимшилик ҳәм жынайый жуўапкершилик белгиленбекте. Соның менен бирге, бундай қураллар, қурамында күшли тәсир етиўши қуралларды нызамға қайшы түрде үгит-нәсиятлайтуғын материалларды тарқатқаны ямаса реклама еткени ушын жуўапкершилик күшейтилмекте.
Экофракция ағзалары бул нызам жойбарының қабыл етилиўи нәшебентлик қураллары, олардың аналоглары, психотроп қураллар, күшли тәсир етиўши ҳәм зәҳәрли қуралларды үгит-нәсиятлаў ямаса реклама етилиўин, олардың нызамға қайшы айланысының алдын алыўға хызмет ететуғынын атап өтти. Бул болса халықтың саламатлығын ҳәм миллет генофондына зыян жеткеретуғын усы түрдеги қураллардың еркин айланысына шек қояды.
Мухтарама КОМИЛОВА,
ӨзАның хабаршысы