Өзбек жаўынгерлик өнериниң заманагөй спорт түри сыпатында кеңнен тарқалыўында,  спорт терминологиясының ислеп шығылыўында, қағыйдаларының енгизилиўинде жеке гүрес спорт түрлери шебери Полат Усмановтың орны айрықша.

Нөкис қаласындағы 2-санлы спорт мектебинде Өзбекстан «Өзбек жаўынгерлик өнери» федерациясы президенти Полат Усмановтың басшылығында тренер-муғаллимлер менен шеберлик сабағы өткерилди.

Онда атап өтилгениндей, миллий үрп-әдет, дәстүр ҳәм қәдириятларға тийкарланған заманагөй спорт түрлериниң жаратылыўы халықаралық майданда ўатанымыз атының улығланыўына хызмет етпекте.

Өткерилген ушырасыў ҳәм шеберлик сабағына республикамыздың барлық қала ҳәм районларынан тренер-муғаллимлер қатнасып, оларға өзбек жаўынгерлик өнери спорт түриниң «Матонат» усылының жаңа қағыйдалары таныстырылып, әмелде қолланылыўы көрсетилди.

Буннан соң шеберлик сабағы даўамында өткен 2023-жыл даўамында жақсы жетискенликлерге ерискен спортшылар ҳәм  бир қатар қәнигелерге сертификатлар тапсырылды.

Ә.Жийемуратов,

Қарақалпақстан хабар агентлиги