Ҳәзирги күнлери пүткил республикамыз бойлап «Жаңа турмыс ушын, жаңа Өзбекстан ушын»  сүрени астында «Мәҳәлледе дуў-дуў гәп» атамасында мәдений-ағартыўшылық илажлары ҳәм «Жаслар ушын-мың китап» жойбары əмелге асырылмақта.

Усы жойбар шеңберинде Қарақалпақстан Республикасы Министрлер Кеңеси Баслығының орынбасары М.Ахмедова ҳәм Қарақалпақстан Республикасы Жоқарғы Кеңесиниң бас қәнигеси Б.Айымбетовалар Хожели районы Мәлимлеме-китапхана орайында болып, Руўхыйлық ҳəм ағартыўшылық орайы районлық бөлими қəнигелери, мектеплердеги мәлимлеме-китапхана орайы хызметкерлери, аймақлардаға ҳаял-қызлар белсендилери ҳәм мектеп оқыўшылары менен ушырасты.

Онда баянатшылар тәрепинен Президентимиз Ш. Мирзиёевтиң басшылығында 2023-жыл 22-декабрь күни өткерилген Руўхыйлық ҳәм ағартыўшылық Кеӊеси мәжилисиндеги белгиленген ўазыйпалар, китапқумарлық мәдениятын жетилистириў, түрли бағдар ҳәм мазмундағы әдебиятларды басып шығарыўды көбейтиў, «Жаслар ушын-мың китап» жойбарын əмелге асырыў,  ең белгили илимий-көпшилик китапларды ана тилимизге аўдарып, мектеп ҳәм китапханаларға бийпул тарқатыў жолға қойылатуғынлығы ҳаққында айтып өтилди.

Илаж даўамында шөлкемлестириўшилер китапхана турмысы менен танысып, онда жаратылған шараятлар бойынша өзлериниң пикир-усынысларын билдирди.

Адилбай Оразов

Қарақалпақстан хабар агентлиги шолыўшысы