Бүгин, 8-январь – Өзбекстан Республикасы прокуратура уйымлары хызметкерлери күни.
2016-жыл 19-декабрьдеги «Өзбекстан Республикасы прокуратура уйымлары хызметкерлери күнин белгилеў ҳаққында»ғы нызамға бола, 8-январь Өзбекстанда прокуратура уйымлары хызметкерлери күни етип белгиленген. Соннан берли бул сәне елимизде кеңнен белгиленип келинбекте.
Прокуратура уйымлары – мәмлекетте нызамлылықты беккемлеў, пуқаралардың ҳуқықлары менен еркинликлерин қорғаў, жынаятшылық ҳәм ҳуқықбузарлықлардың алдын алыў бағдарында избе-из жумыс алып бармақта.
Прокуратура уйымларының бүгинги жумысы Өзбекстан Республикасы Президентиниң басшылығында әмелге асырылып атырған реформаларды, соның ишинде, жаңа редакциядағы Конституция талапларының толық ҳәм сөзсиз орынланыўын тәмийинлеў, барлық тараўларда нызамлылықты беккемлеўге қаратылған.
Прокуратура уйымлары тәрепинен анықланған нызамбузылыў жағдайлары бойынша қолланылып атырған қадағалаў ҳүжжетлери себепли мыңлаған пуқараның бузылған ҳуқықлары тикленбекте.
Халықты социаллық қорғаў, бәнтлигин тәмийинлеў, мүтәж шаңарақларды, жаслар ҳәм ҳаял-қызларды ҳәр тәреплеме қоллап-қуўатлаўға байланыслы нызамшылықтың орынланыўын тәмийинлеўге айрықша итибар қаратылып атыр.
Исбилерменлик субъектлерин ҳәр тәреплеме қоллап-қуўатлаў, қолайлы бизнес орталығын жаратыў мәселеси де прокуратура уйымларының итибарында.
Атап айтқанда, исбилерменликти жедел раўажландырыў, инвестицияларды тартыў, экспорт көлемин арттырыў сыяқлы экономиканың раўажланыўындағы әҳмийетли бағдарларда системалы илажлардың әмелге асырылғаны нәтийжесинде 2023-жылдың 9 айында дерлик 12 мың исбилерменниң бузылған ҳуқықларын тиклеўде, 26 мыңнан асламына машқалаларды сапластырыўда жәрдемлескен.
Прокурорлар тәрепинен жанылғы-энергетика, қурылыс, гүзги-қысқы мәўсимге таярлық, экология сыяқлы тараўларда әмелге асырылған жумыслар ҳәм бар машқалалар өз ўақтында анықланып, шешилмекте.
Атап айтқанда, гүзги-қысқы мәўсимде халық, экономика тармақлары ҳәм социаллық тараў объектлерин энергия ресурслары менен турақлы тәмийинлеў мақсетинде қысқа мүддетте прокуратура уйымларының араласыўы алмасыўы нәтийжесинде 300 ден аслам тийкарғы машқаланың сапластырылыўына ерисилди.
Соның ишинде, тәбийғый газ, электр энергиясы, ишимлик суўы ҳәм ыссылық тармақлары қурылды. Газди бөлистириў, трансформатор пунктлери, суў насослары ҳәм қазанханалар жаңаланды, көп квартиралы турақ жайлар және олардың инженерлик-коммуникация тармақлары оңланды.
Көмир өнимлерин орынларға турақлы жеткерип бериўди тәмийинлеў, көмирди талан-тараж етиўдиң алдын алыў бағдарында прокуратура уйымлары тәрепинен белгили жумыслар әмелге асырылды.
Жер ресурсларынан нәтийжели ҳәм ақылға уғрас пайдаланыўды тәмийинлеў мәселелери бойынша да қадағалаў илажлары өткерилмекте. Өзбасымшалық пенен ийелегени анықланған жер майданларының резервке қайтарылыўы тәмийинленбекте.
Жынаятшылыққа қарсы гүресиў жумысларын шөлкемлестириў, тергеўдиң сапасын арттырыў, коррупция жағдайларының алдын алыў мәселелери де турақлы күн тәртибинде. Ҳәзирги ўақытта ҳуқықбузарлықлар профилактикасы илажларын және де күшейтиў, жағдайдың турақлылығына унамсыз тәсир көрсететуғын факторларды ерте анықлаў ҳәм сапластырыў, жынаят жазасыз қалмаўын тәмийинлеў бойынша барлық илажлар көрилмекте.
Халықтың машқалаларын шешиў, мүрәжатлар менен ислесиў прокуратура уйымларында системалы жолға қойылған. Халық пенен ашықтан-ашық сөйлесиў, пуқараларды қыйнап атырған машқалаларды шешиўге тийкарғы әҳмийет қаратылмақта.
Норгул Абдураимова,
ӨзА