Kúni keshe Nepalda bir qatar iri sociallıq tarmaqlar qadaǵan etilgennen keyin húkimetke qarsı baslanǵan tártipsizlik mámleket infrastrukturasına misli kórilmegen zıyan jetkerdi. Jergilikli portal Qala qurılısı ministrligindegi derekke súyenip jazıwınsha, ulıwma zıyan 1,4 milliard dollardan artqan.

– Kópshilik imaratlardı tiklep bolmaydı, jer silkiniwden keyingi jaǵday sıyaqlı tek ǵana ońlaw hám qayta paydalanıw múmkin emes, – deydi derek. – Qayta qurıw ushın 200 milliard rupiy (shama menen 1,4 milliard dollar – redakciya) dan kóbirek qarjı kerek.
Ótken hápteniń aqırında Nepal rásmiyleri Baylanıs hám málimleme texnologiyaları ministrliginde belgilengen múddette dizimnen óte almaǵan bir qatar iri sociallıq tarmaqlardıń jumısın qadaǵan etti. Bunnan keyin mámlekette jaslardıń ǵalaba narazılıq demonstraciyası baslanıp ketti. Waqıyaǵa ǵalaba xabar quralları “Z áwlad revolyuciyası”, dep atama berdi.
Densawlıqtı saqlaw hám xalıq ministrliginiń maǵlıwmatına bola, mámlekettegi tártipsizlik nátiyjesinde 34 adam emlewxanada qaytıs bolǵan, mıńnan aslam jábirlengen adamǵa medicinalıq járdem kórsetilmekte.
Húkimet sociallıq tarmaqqa qoyılǵan qadaǵalawdı biykarlaǵanına qaramastan, miting toqtamadı. Alaman Bas ministr Sharma Aliniń otstavkasın talap etti. Siyshembi kúni kóterilisshiler jetekshiniń jeke rezidenciyasına ot berdi, húkimet kompleksine bastırıp kirdi. Húkimdar Nepal Kongress partiyası oraylıq mákemesi hám parlament imaratın órtep jiberdi. Aqıbetinde Bas ministr otstavkaǵa shıǵıwǵa májbúr boldı. Húkimet aǵzaları óz turaq jayınan vertolyotta evakuaciyalanǵanı aytılmaqta.
Siyshembi kúni keshte Qurallı kúshler aqırında Katmandu hám mámlekettiń basqa qalaları kóshelerin qadaǵalawǵa aldı.

S.Rahimov, ÓzA