Nókis qalasında Qaraqalpaqstan Respublikası Mektepke shekemgi hám mektep bilimlendiriwi ministrliginiń shólkemlestiriwinde “Sheber muǵallim – millet súyenishi!” atamasında “IV Ustazlar milliy forumı” bolıp ótti.
Forumǵa taraw basshıları, keń jámiyetshilik wákilleri, respublikamızdıń barlıq qala hám rayonlarınan tájiriybeli muǵallimler qatnastı.

Forum sheńberindegi ilajlar muǵallimler tárepinen tayarlanǵan, oqıwshılarǵa sabaq ótiwde paydalanılatuǵın zamanagóy oqıtıw qurallarınıń, qollanbalardıń, qoldan tayarlanǵan buyımlarınıń kórgizbesi menen baslandı.
Nókis qalasındaǵı «Kardar stem international school» mámleketlik emes bilimlendiriw mákemesinde mektep muǵallimleri ushın, 27-sanlı mektepke shekemgi bilimlendiriw shólkeminde tárbiyashılar ushın sekciya jumısları alıp barıldı.
Onda pán baǵdarları boyınsha oqıw maqsetleri, jańa oqıw-metodikalıq kompleksler hám olardan paydalanıw boyınsha usınıslar, sabaqlıqlarda qollanılǵan aldınǵı metodikalar, Qubla Koreya tájiriybesi tiykarında mektepke shekemgi jastaǵı balalardı rawajlandırıwda innovaciyalıq qatnaslar – oyınǵa tiykarlanǵan bilimlendiriw, baslawısh bilim beriwde informatika hám málimleme texnologiyaları pánin oqıtıwdıń zamanagóy usılları hám quralları, bilimlendiriwdegi zamanagóy qatnas, úlgili sabaq shólkemlestiriw hám onı talqılaw, kriteriyalarǵa tiykarlanǵan bahalaw sistemasınıń maqseti hám mánisi, joybarǵa tiykarlanǵan bilimlendiriw, eMaktab platformasınan paydalanıw imkaniyatları boyınsha trening sabaqları shólkemlestirildi.
Qaraqalpaqstan Respublikası Mektepke shekemgi hám mektep bilimlendiriwi ministrligi tárepinen forum qatnasıwshıları arnawlı sertifikatlar menen sıylıqlandı.
Forum dawamında Berdaq atındaǵı Qaraqalpaq mámleketlik akademiyalıq muzıkalı teatrında májilis ótkerildi.
Onda Qaraqalpaqstan Respublikası Ministrler Keńesi Baslıǵınıń orınbasarı B.Ótemuratov shıǵıp sóylep, “IV Ustazlar milliy forumı” qatnasıwshıların qızǵın qutlıqladı.
Qaraqalpaqstan Respublikası Mektepke shekemgi hám mektep bilimlendiriwi ministri G.Kojabaeva bilimlendiriw tarawında alıp barılıp atırǵan reformalar haqqında tolıq maǵlıwmat berdi.
Atap ótilgenindey, usı forum arqalı bilimlendiriw tarawındaǵı reformalar, oqıw rejeleri hám baǵdarlamalar, sabaqlıqlar, sonday-aq, oqıw procesine engiziletuǵın aldıńǵı metodikalardıń mazmunı-mánisin taraw xızmetkerlerine jetkerip beriw maqset etilgen.
Prezidentimiz tárepinen muǵallimlerdiń jámiyettegi abırayın arttırıw, keleshegimiz bolǵan jas áwladqa sapalı bilim beriw, jańa áwlad sabaqlıqların jaratıw, oqıwshı jaslardı kásip-ónerge baǵdarlaw, bilimlendiriw mákemeleriniń materiallıq-texnikalıq bazasın bekkemlew, oqıw-tárbiya jumısların sapalı shólkemlestiriw boyınsha bir qatar wazıypalar belgilengen.
Qaraqalpaqstan Respublikası Mektepke shekemgi hám mektep bilimlendiriwi ministrligi tárepinen bilimlendiriw sapası baǵdarları boyınsha “Qaraqalpaqstan tájiriybesi” sıpatında “Aǵla mektep-2025” joybarı 2025-jıl mart ayınan baslap aymaqtaǵı barlıq ulıwma orta bilim beriw mekteplerinde engizildi.
Qaraqalpaqstan Respublikası Mektepke shekemgi hám mektep bilimlendiriwi ministrliginiń kkbilimlendiriw.uz elektron platformasına mektepler hám olardıń nátiyjeleri turaqlı túrde kirgizilip barılmaqta hám jıldıń aqırında bahalaw kriteriyaları tiykarında jeńimpazlar anıqlanıwı rejelestirilgen.
Oqıwshılarga sapalı bilim beriwdiń dárejesin turaqlı baqlap barıw maqsetinde tájiriybe sıpatında respublikamız boyınsha Nókis qalası hám rayonlardan 17 ulıwma orta bilim beriw mektepleri belgilenip, oqıw jılı dawamında sabaq analizleri ótkerilip barıldı. Bul jumıslar alıp barılǵan mektep oqıwshılarınan fevral ayında ótkerilgen monitoring nátiyjesinde 50,9 procent nátiyje kórsetken bolsa, may ayında bul kórsetkish 60,9 procentti quradı.
“Sanlı kitapxana” (lib.uzedu.uz) sisteması arqalı buyırtpa beriw, sabaqlıqlardı mekteplerge jetkerip beriw boyınsha modul tájiriybe-sınaw ótkerildi hám usı oqıw jılınan baslap ámeliyatqa engiziledi.
Respublikalıq bilimlendiriw orayınıń pán metodistleri tárepinen hár bir oqıw jılı ushın tastıyıqlanǵan bilim dárejesi joqarı bolmaǵan mekteplerge “Metodikalıq-tur” Qaraqalpaqstan tájiriybesi joybarı tiykarında mánzilli metodikalıq járdem berilip barılmaqta.
Úzliksiz kásiplik rawajlandırıw sisteması tiykarında, kaskad usılı arqalı 6302 pedagogtıń qánigeligi arttırıldı.
2024-2025-oqıw jılında ulıwma orta bilim beriw mákemelerinde muǵallimlerdiń kásiplik rawajlanıwın támiyinlew maqsetinde «Kásiplik rawajlanıw kúni» hám «Kásiplik rawajlanıw saatı» ilajları ámelge asırıldı. Ótken oqıw jılı dawamında 144 mıńnan aslam baslawısh klass oqıwshılarınıń biypul awqatlanıwı támiyinlendi.
Qaraqalpaqstan Respublikasında 1995 mektepke shekemgi bilimlendiriw shólkemleri jumıs alıp barıp, 3-7 jasqa shekemgi bolǵan 154 544 baladan 130 039 bala qamtıp alınıp, balalardı baqshalarǵa qamtıw 84,1 procentke jetti.
Ilajda Qaraqalpaqstan Respublikası Mektepke shekemgi hám mektep bilimlendiriwi ministrligi tárepinen 11 muǵallim “Qaraqalpaqstan Respublikası Xalıq bilimlendiriw aǵlası” kókirek belgisi, sonday-aq, forumda trenerlik etken 15 muǵallim Húrmet jarlıqları menen sıylıqlandı.
Ilaj mádeniyat tarawı xızmetkerleri tárepinen tayarlanǵan koncert baǵdarlaması menen dawam etti.
Forumnıń dawamı 19-20-avgust sánelerinde Nókis qalası hám rayonlar kóleminde hám pedagogikalıq keńesler tárizinde 25-29-avgust sánelerinde barlıq mekteplerde shólkemlestiriledi.

Á.Jiyemuratov,
Qaraqalpaqstan xabar agentligi