Ўзбекистон Республикаси Президентининг 

қ а р о р и

Мамлакатимизда интеллектуал мулк соҳасида, шу жумладан, мазкур соҳада давлат бошқаруви тизимини такомиллаштириш бўйича ислоҳотлар изчил амалга оширилмоқда.

Ўзбекистон Республикаси Президентининг 2019 йил 8 февралдаги “Интеллектуал мулк соҳасида давлат бошқарувини такомиллаштириш чора-тадбирлари тўғрисида”ги ПҚ–4168-сон қарорига мувофиқ интеллектуал мулкни ҳуқуқий муҳофаза қилиш ва умумэътироф этилган халқаро нормаларни имплементация қилишга оид фаолияти қониқарсиз деб топилганлиги сабабли Интеллектуал мулк агентлиги Ўзбекистон Республикаси Адлия вазирлиги тизимига ўтказилди.

1. Ўзбекистон Республикаси Адлия вазирлиги ҳузуридаги Интеллектуал мулк агентлиги (кейинги ўринларда – Агентлик) ижро этувчи аппаратининг бошқарув ходимлари чекланган сони 61 штат бирлигидан иборат янгиланган тузилмаси 1-иловага мувофиқ тасдиқлансин.

Ўзбекистон Республикаси адлия вазирига ходимларнинг белгиланган чекланган сони доирасида Агентликнинг ижро этувчи аппарати тузилмасига ўзгартиришлар киритиш, шунингдек, зарур ҳолларда Ўзбекистон Республикаси Адлия вазирлиги (кейинги ўринларда – Адлия вазирлиги) ва Агентликнинг бюджетдан ташқари маблағлари ҳисобидан қўшимча штат бирликларини жорий этиш ҳуқуқи берилсин.

2. Қуйидагилар Агентликнинг асосий вазифалари этиб белгилансин:

интеллектуал мулк соҳасида ягона давлат сиёсатининг амалга оширилишини таъминлаш, ихтиролар, фойдали моделлар, саноат намуналари, товар белгилари ва бошқа интеллектуал мулк объектларини ҳуқуқий муҳофаза қилиш;

интеллектуал мулк объектларининг ҳуқуқий муҳофазаси ҳолатини комплекс таҳлил қилиш, ушбу соҳасини ривожлантириш бўйича аниқ таклифларни ишлаб чиқиш;

интеллектуал мулк соҳасидаги ҳуқуқни қўллаш амалиётини изчил ва бир хилда таъминлаш бўйича чора-тадбирларни амалга ошириш;

интеллектуал мулк масалалари бўйича халқаро-ҳуқуқий ҳамкорликни, шу жумладан, интеллектуал мулк объектларига бўлган ҳуқуқларни ўзаро муҳофаза қилиш ҳақидаги халқаро шартномаларни тузиш орқали йўлга қўйиш ва мустаҳкамлаш;

интеллектуал мулк соҳасидаги илмий-тадқиқот ва бошқа ишларни ўтказишда иштирок этиш;

жамиятда ҳуқуқий маданиятни юксалтириш ва интеллектуал мулкка нисбатан ҳурмат ҳиссини шакллантириш.

3. Белгилаб қўйилсинки:

а) Агентлик:

интеллектуал мулк объектларига бўлган ҳуқуқларни муҳофаза ва ҳимоя қилиш соҳасида ягона давлат сиёсатини амалга оширувчи ваколатли давлат бошқаруви органи;

Ўзбекистон Республикаси Интеллектуал мулк агентлигининг шартномалари ва мажбуриятлари бўйича ҳуқуқий вориси ҳисобланади;

б) Агентлик фаолиятига умумий раҳбарлик ва уни назорат қилиш, моддий-техника базасини мустаҳкамлаш ва Агентлик ходимларининг малакасини оширишни ташкил этиш Адлия вазирлиги томонидан амалга оширилади;

в) Ўзбекистон Республикасининг норезидентлари – юридик ва жисмоний шахслардан келиб тушган патент божлари ва тўловларнинг 20 фоизи миқдоридаги маблағлар, Ўзбекистон Республикасининг резидентлари – юридик ва жисмоний шахслардан келиб тушган патент божлари ва тўловларнинг 80 фоизи миқдоридаги маблағлар, электрон ҳисоблаш машиналари учун дастурлар ва маълумотлар базаларини рўйхатдан ўтказиш учун амалга оширилган тўловлар, интеллектуал мулк соҳасидаги маъмурий ҳуқуқбузарлик учун қўлланиладиган маъмурий жарима суммалари, қонунчиликка мувофиқ пуллик хизматлар кўрсатишдан тушган маблағлар Агентликнинг бюджетдан ташқари жамғармасига белгиланган тартибда ўтказилади;

г) Агентликнинг бюджетдан ташқари жамғармаси маблағлари Агентлик томонидан тасдиқланадиган ва қонунчиликда белгиланган тартибда рўйхатдан ўтказиладиган харажатлар сметаси ва штатлар жадвалига асосан Агентликни сақлаб туришга, унинг моддий-техника базасини шакллантириш ва мустаҳкамлашга, Агентлик ходимларининг меҳнатига ҳақ тўлаш, моддий рағбатлантириш ва ижтимоий ҳимоя қилишга ҳамда қонун ҳужжатларига мувофиқ бошқа мақсадларга йўналтирилади.

4. Адлия вазирлиги:

а) бир ой муддатда Ўзбекистон Республикаси Молия вазирлиги билан биргаликда Агентликнинг бюджетдан ташқари жамғармаси маблағларидан фойдаланиш тартибини ҳамда Ўзбекистон Республикасининг резидентлари ва норезидентлари бўлган юридик ва жисмоний шахсларнинг патент божлари ва тўловларидан ўрнатилган тартибда тушадиган маблағларни йўналтириш тартибини белгилашни назарда тутувчи ҳукумат қарори лойиҳасини Вазирлар Маҳкамасига киритсин;

б) икки ҳафта муддатда:

мазкур қарорнинг 3-банди “в” кичик бандида кўрсатилган маблағлар келиб тушишининг алоҳида ҳисобини юритиш учун тегишли банк ва ғазна шахсий ҳисобварақалари очилишини;

Агентликнинг ғазна шахсий ҳисобварақасидаги қолдиқ маблағлар Агентликнинг бюджетдан ташқари жамғармаси шахсий ҳисобварақасига ўтказилишини таъминласин;

в) икки ой муддатда Агентлик ходимларини белгиланган тартибда аттестациядан ўтказиш орқали Агентликнинг интеллектуал мулк соҳасида чуқур билимларга ҳамда амалий иш тажрибасига эга ҳалол, тартиб-интизомли ва малакали кадрлар билан тўлдирилишини таъминласин.

5. Агентлик фаолиятини молиялаштиришнинг асосий манбалари этиб Ўзбекистон Республикаси Давлат бюджети маблағлари, қонунчиликда ўрнатилган тартибда шакллантириладиган Адлия вазирлиги ва Агентликнинг бюджетдан ташқари маблағлари ҳамда қонун ҳужжатларида тақиқланмаган бошқа маблағлар белгилансин.

6. Агентликка қуйидаги ҳуқуқлар берилсин:

давлат органлари, корхоналари, муассасалари ва бошқа ташкилотлар фаолиятида интеллектуал мулк соҳасидаги қонунчилик талабларига риоя этилиши бўйича ўрганишлар ўтказиш;

давлат органлари, корхоналари, муассасалари ва бошқа ташкилотлар раҳбарларига аниқланган қонунбузилишлар, уларга имкон берувчи сабаб ва шарт-шароитларни бартараф этиш ҳақида кўриб чиқилиши мажбурий бўлган тақдимномалар киритиш;

интеллектуал мулк соҳасидаги қонун ҳужжатлари бузилишига йўл қўймаслик ҳақида мансабдор шахсларни ёзма равишда огоҳлантириш;

интеллектуал мулк соҳасидаги қонун ҳужжатларини бузганлик учун давлат органлари, корхоналари, муассасалари ва бошқа ташкилотлар мансабдор шахсларига нисбатан маъмурий жазо қўллаш;

Ўзбекистон Республикаси Вазирлар Маҳкамаси билан келишилган ҳолда малакали хорижий мутахассисларни уларга истисно тариқасида Агентликнинг бюджетдан ташқари маблағлари ҳисобидан хорижий валютада иш ҳақи ва бошқа тўловларни белгилаган ҳолда ходимлар ва маслаҳатчилар сифатида жалб қилиш.

7. Адлия вазирлигининг ҳудудий бўлинмаларига қуйидаги қўшимча вазифалар юклатилсин:

корхоналар, муассасалар ва ташкилотларга интеллектуал мулк объектларини ҳуқуқий муҳофаза қилишни таъминлаш бўйича консультатив ва амалий кўмаклашиш;

интеллектуал мулк объектларининг ҳуқуқий муҳофаза қилинишини, муаллифларнинг ва бошқа ҳуқуқ эгаларининг ҳуқуқлари муҳофаза қилинишини таъминлаш бўйича, шу жумладан, контрафакт маҳсулотларни ишлаб чиқариш, чиқариш, реализация қилишга қарши курашишда ваколатли давлат органларига кўмаклашиш орқали тегишли чоралар кўриш;

давлат ва хўжалик бошқаруви органлари, маҳаллий давлат ҳокимияти органларининг интеллектуал мулк соҳасини тартибга солишдаги фаолиятида ҳуқуқни қўллаш амалиётини изчил ва бир хилда таъминлаш;

аҳоли ўртасида интеллектуал мулк муҳофазаси соҳасида ҳуқуқий маданиятни ошириш бўйича тарғибот тадбирларини ташкиллаштириш ва ўтказиш.

8. Адлия вазирлигининг қуйидаги таклифларига розилик берилсин:

“Интеллектуал мулк соҳасида кадрларни қайта тайёрлаш ва уларнинг малакасини ошириш ўқув маркази” давлат унитар корхонасини “Ўзбекистон Республикаси Адлия вазирлиги ҳузуридаги Интеллектуал мулк агентлиги қошидаги Интеллектуал мулк консультатив маркази” давлат унитар корхонаси этиб қайта номлаш;

2019/2020 ўқув йилидан бошлаб Тошкент давлат юридик университетида “Интеллектуал мулк ҳуқуқи” мутахассислиги бўйича янги магистратура йўналишини очиш ва унга базавий олий маълумотдан қатъий назар интеллектуал мулк соҳасидаги мутахассисларни тайёрлаш вазифасини юклаш;

Ўзбекистон Республикаси Адлия вазирлиги ҳузуридаги Юристлар малакасини ошириш марказига интеллектуал мулк соҳасидаги кадрларнинг малакасини, шу жумладан, пуллик асосда ошириш бўйича қўшимча вазифа юклаш.

9. Белгилаб қўйилсинки:

а) Адлия вазирлиги ҳузурида Ўзбекистон Республикаси адлия вазири раис ҳисобланадиган интеллектуал мулк объектларининг ҳуқуқий муҳофазаси билан боғлиқ бўлган апелляцияларни судгача кўриб чиқувчи Апелляция кенгаши ташкил этилади;

Апелляция кенгаши таркибига интеллектуал мулк соҳасидаги мустақил олимлар ва мутахассислар киради;

Апелляция кенгашининг таркибида Адлия вазирлиги ва Агентлик ходимлари сони Апелляция кенгаши аъзолари умумий сонининг ўттиз фоизидан ошмаслиги лозим;

б) қуйидаги мезонларга мувофиқ келувчи товар белгиси ва хизмат кўрсатиш белгиси (кейинги ўринларда – товар белгиси) Ўзбекистон Республикасида ҳаммага маълум деб эътироф этилади:

товар белгиси қўлланиладиган товарлар ва (ёки) хизматларнинг тури Ўзбекистон Республикасининг амалдаги ва (ёки) потенциал истеъмолчилари томонидан ёхуд товар белгиси қўлланиладиган товарлар ва (ёки) хизматларнинг тури уни тарқатилишини таъминлашда иштирок этаётган шахслар томонидан ёхуд товар белгиси қўлланиладиган товарлар ва (ёки) хизматларнинг турига алоқадор бўлган ишбилармонлар доираси томонидан таниб олиниши, бунда товарнинг сифат даражаси ҳақида тушунча мамлакатдаги товар белгиси билан боғлиқ бўлиши керак;

аввалдан хос бўлган ёки фаол фойдаланиш натижасида вужудга келган юқори фарқланиш хусусияти;

Ўзбекистон Республикаси ҳудудида, шу жумладан, Интернет тармоғининг миллий сегменти домен номлари тизимида товар белгисидан кенг фойдаланиш ва унинг реклама қилиниши;

республикада узоқ муддат давомида ва фаол фойдаланиш натижасида вужудга келган тижорат қиймати;

в) Апелляция кенгаши томонидан қарор қабул қилишда юқоридаги мезонлар билан бир қаторда мазкур қарорда акс этмаган ушбу соҳадаги халқаро стандартлар, шу жумладан, Бутунжаҳон интеллектуал мулк ташкилотининг ҳужжатларига мувофиқ қўшимча мезонлар инобатга олиниши мумкин.

10. Агентлик Тошкент шаҳри, Мустақиллик шоҳ кўчаси, 59-уйга беғараз фойдаланиш ҳуқуқи асосида жойлаштирилсин.

11. Ўзбекистон Республикаси Вазирлар Маҳкамаси икки ҳафта муддатда Ўзбекистон Республикаси Адлия вазирлиги ҳузуридаги Интеллектуал мулк агентлиги тўғрисидаги низомни тасдиқласин.

12. Ўзбекистон Республикаси Президентининг ва Ўзбекистон Республикаси Вазирлар Маҳкамасининг айрим қарорларига 2-иловага мувофиқ ўзгартириш ва қўшимчалар киритилсин.

14. Адлия вазирлиги манфаатдор вазирлик ва идоралар билан биргаликда икки ой муддатда қонун ҳужжатларига мазкур қарордан келиб чиқадиган ўзгартириш ва қўшимчалар тўғрисида Ўзбекистон Республикаси Вазирлар Маҳкамасига таклифлар киритсин.

15. Мазкур қарорнинг ижросини назорат қилиш Ўзбекистон Республикасининг Бош вазири А.Н.Арипов зиммасига юклансин.

Ўзбекистон Республикаси

Президенти                                                                       Ш.МИРЗИЁЕВ

Тошкент шаҳри,

2019 йил 1 июль