Дарҳақиқат, йилнинг сўнгги кунлари яқинлашиб, 2025 йил ўзининг бой эсталиклари, юксак ютуқлари ва тарихда муҳим из қолдирадиган янгиликлари билан эсда қолмоқда.

Йил якунида ҳар биримиз ўтган кунларни таҳлил қилиб, эришилган натижаларни таҳлил қиламиз. Шу муносабат билан Самарқанд давлат ветеринария медицинаси, чорвачилик ва биотехнологиялар университети Нукус филиалида йил якуни ва талаба-ёшларни тантанали тақдирлаш маросими бўлиб ўтди.

Маросимни филиал директори А.Есимбетов очиб, йиғилганларни яқинлашиб келаётган янги йил билан самимий табриклаб, йил давомида эришилган ютуқларни таъкидлади.

– Жорий йил филиалимиз учун ҳақиқатан ҳам баракали ва самарали йил бўлди. Илмий изланишлар, спорт майдонидаги муваффақиятлар, маънавий тадбирлар ва танловлардаги ютуқларимиз бизни фақат ва фақат қувонтиради. Ҳар бир ижобий натижа, ҳар бир ғалаба – бу филиалимизнинг ҳар бир профессор-ўқитувчиси ва талаба-ёшларининг меҳнати ифодасидир. Келажакка қараб босган ҳар бир дадил қадамимиз филиалнинг ривожланиши ва сиз ёшларнинг ўсишига хизмат қилади, йўл қўйилган камчиликларни эса тез ва изчил чоралар билан бартараф этамиз, – дейди профессор А.Есимбетов.

Тадбир давомида талаба-ёшлар «Директор кубоги» доирасидаги спорт мусобақалари, интеллектуал ўйинлар, ижодий ва маънавий танловларда эришган ютуқлари учун пул мукофоти ва дипломлар билан тақдирланди.

Тадбир концерт дастури билан давом этди.

Қорақалпоғистон ахборот агентлиги