Shınında da, jıldıń sońǵı kúnleri jaqınlasıp, 2025-jıl óziniń bay estelikleri, joqarı jetiskenlikleri hám tariyxta áhmiyetli iz qaldıratuǵın jańalıqları menen este qalmaqta.

Jıl juwmaǵında hár birimiz ótken kúnlerdi analizlep, erisilgen nátiyjelerdi tallaymız. Usı múnásibet penen, Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında jıl juwmaǵı hám student-jaslardı saltanatlı sıylıqlaw máresimi bolıp ótti.
Máresimdi filial direktorı A.Esimbetov ashıp, jıynalǵanlardı jaqınlasıp kiyatırǵan jańa jıl menen qızǵın qutlıqlap, jıl dawamında erisilgen jetiskenliklerdi atap ótti.
— Bıyılǵı jıl filialımız ushın haqıyqatında da bereketli hám nátiyjeli jıl boldı. Ilimiy izleniwler, sport maydanındaǵı tabıslar, ruwxıy ilajlar hám tańlawlardaǵı jetiskenliklerimiz bizdi tek ǵana quwanıshqa bóleydi. Hár bir unamlı nátiyje, hár bir jeńis – bul filialımızdıń hár bir professor-oqıtıwshısı hám student-jaslarınıń miynetiniń kórinisi. Keleshekke qaray basqan hár bir batıl qádemimiz filialdıń rawajlanıwı hám siz jaslardıń ósiwine xızmet etedi, al jol qoyılǵan kemshiliklerdi bolsa jedel hám izbe-iz ilajlar menen saplastıramız, – deydi professor A.Esimbetov.
Ilaj dawamında student-jaslar “Direktor kubogi” sheńberindegi sport jarısları, intellektuallıq oyınlar, dóretiwshilik hám ruwxıy tańlawlarda erisken jetiskenlikleri ushın aqshalay hám diplomlar menen sıylıqlandı.
Ilaj koncert baǵdarlaması menen dawam etti.

Qaraqalpaqstan xabar agentligi