Юртимизда меҳнат қилган инсоннинг халқ учун қилган хизматлари ҳеч қачон эътибордан четда қолмаган. Айниқса, Президентимизнинг алоҳида эътибори билан ҳар бир соҳа фидойисининг хизматлари муносиб баҳоланиб, рағбатлантириб келинмоқда.

«Қишлоқ хўжалиги ходимлари куни» муносабати билан Ҳурматли Президентимизнинг юксак давлат мукофотлари билан тақдирланганлар орасида, Беруний тумани Бийбозор қишлоқ фуқаролар йиғини ҳудудида 30 йилдан ортиқ пиллачилик билан шуғулланиб келаётган Гулбаҳор Юсупова ҳам бор. Унга берилган «Ўзбекистон Республикасида хизмат кўрсатган пиллачи» унвони бутун Қорақалпоғистон пиллакорлари учун берилган юқори баҳо бўлди.

Асосий касби ўқитувчи бўлган Г.Юсупова қўшимча равишда ўз уйида пилла етиштириш билан шуғулланади. Оила аъзолари билан ҳамжиҳатликда олиб борилган меҳнатлари натижасида бу йилги 2025 йили 1 тонна 100 кг пилла топшириб, «“KKR Ipak klaster” билан тузилган шартнома режасини ортиғи билан бажаришга эришди.

Тошкент шаҳрига бориб, Президентимиз томонидан тақдирланиб қайтган Гулбаҳорнинг қувончи чексиз.

– Ўттиз йилдан буён оила аъзоларимиз билан биргаликда ипак қурти боқиш ва пилла етиштириш билан шуғулланиб келмоқдамиз. Бизларга кластер томонидан ўн олти қути ипак қурти берилади, режа 900 кг бўладиган бўлса, бизлар режани бир тоннадан зиёд қилиб бажариб келяпмиз. Туманнинг энг чекка қишлоғида яшаб, меҳнат қилаётган биз пиллакорларнинг меҳнатларини эътиборсиз қолдирмай муносиб тақдирлагани учун ҳурматли Президентимизга миннатдорчилигим чексиз, – дейди у.

Мамлакатимизда пиллачилик соҳасига берилаётган эътибор ҳамда бу йўналишда меҳнат қилаётган хотин-қизлар меҳнатининг муносиб баҳоланишига Гулбаҳорнинг мисолида яна бир бор гувоҳ бўлдик. Ушбу давлат мукофоти уни янада меҳнатсеварликка, эл-юртимизга хизмат қилишдек олижаноб ишларга руҳлантирмоқда.

                                                 Г.Турдишова, Қорақалпоғистон ахборот