2025 йил ноябрь ойида Ўзбекистонга электромобиллар импорти сўнгги беш ой ичидаги энг паст даражага тушди. Бу ҳақда Божхона қўмитаси расмий веб-сайтида маълум қилинди.

Маълумотларга кўра, ноябрь ойида мамлакатга жами 4 597 дона электромобиль импорт қилинган бўлиб, уларнинг умумий қиймати 68,2 миллион долларни ташкил этди. Таққослаш учун, октябрь ойида 6 933 дона, сентябрда эса 11 534 дона электромобиль хориждан олиб кирилган.

Электромобиллар импорти 2025 йил июль ойидан бошлаб сезиларли даражада ўсган. Жумладан, июнь ойида 4 560 дона электромобиль импорт қилинган бўлса, июлда бу кўрсаткич 7 204, август ойида эса 8 071 донани ташкил этган.

Шу билан бирга, ноябрь ойида импорт қилинган электромобилларнинг ўртача қиймати кескин ошгани кузатилди. Хусусан, ҳар бир электромобилнинг ўртача нархи 14,8 минг долларни ташкил этди. Бу кўрсаткич октябрь ойида 10,3 минг доллар бўлган. Бир йил аввал, яъни 2024 йил ноябрь ойида эса бир дона электромобилнинг ўртача қиймати 6,1 минг долларга тўғри келган.

Йиллик ҳисобда олиб қаралганда, 2025 йил январь-ноябрь ойларида Ўзбекистонга жами 51 856 дона электромобиль импорт қилинган бўлиб, уларнинг умумий қиймати 612,2 миллион долларни ташкил этди. Бу ўтган йилнинг шу даврига нисбатан сезиларли ўсишни кўрсатади: 2024 йилнинг мос даврида мамлакатга 24 091 дона электромобиль (224,7 миллион доллар) олиб кирилган. Демак, электромобиллар импорти йил давомида икки баравардан зиёд ошган.

Ш.Маматуропова,

ЎзА