2025-jıldıń noyabr ayında Ózbekstanǵa elektromobiller importı sońǵı bes ay ishindegi eń tómen dárejege tústi. Bul haqqında Bajıxana komitetiniń rásmiy veb-saytında málim etildi.

Maǵlıwmatlarǵa bola, noyabr ayında mámleketke jámi 4 597 elektromobil import etilgen bolıp, olardıń ulıwma bahası 68,2 million dollardı quradı. Salıstırıw ushın, oktyabr ayında 6 933 dana, sentyabrde bolsa 11 534 dana elektromobil sırt elden alıp kelingen.
Elektromobiller importı 2025-jıl iyul ayınan baslap sezilerli dárejede ósken. Sonıń ishinde, iyun ayında 4 560 dana elektromobil import etilgen bolsa, iyulde bul kórsetkish 7 204 avgust ayında bolsa 8 071 bolǵan.
Sonıń menen birge, noyabr ayında import etilgen elektromobillerdiń ortasha bahası keskin artqanı baqlandı. Atap aytqanda, hár bir elektromobildiń ortasha bahası 14,8 mıń dollardı quradı. Bul kórsetkish oktyabr ayında 10,3 mıń dollar bolǵan. Bir jıl aldın, yaǵnıy 2024-jıl noyabr ayında bolsa bir elektromobildiń ortasha bahası 6,1 mıń dollarǵa tuwra kelgen.
Jıllıq esapqa alınǵanda, 2025-jıldıń yanvar-noyabr aylarında Ózbekstanǵa jámi 51 856 dana elektromobil import etilgen bolıp, olardıń ulıwma bahası 612,2 million dollardı quradı. Bul ótken jıldıń usı dáwirine salıstırǵanda sezilerli ósiwdi kórsetedi: 2024-jıldıń sáykes dáwirinde mámleketke 24 091 dana elektromobil (224,7 million dollar) alıp kelingen. Demek, elektromobiller importı jıl dawamında eki eseden zıyat artqan.

Sh.Mamaturopova,
ÓzA