Қонликўл туманидаги «Ёшлар сайли» марказида ўтказилган «Тегирмон-шоу»да «Қонликўл тумани ҳокимлиги кубоги» учун танлов бўлиб ўтди, унда республикамиз туманларидан келган энг кучли жамоалар иштирок этди.

Танловни туман ҳокими Б.Султанов очиб берди ва барча жамоаларга омад тилади.

Мусобақа давомида жамоалар ўзларининг қизиқарли томошалари билан йиғилганларга кўтаринки кайфият улашди.

Танловда жамоалар ўзларининг «Саломлашиш,» «Биатлон,» томошабинлар билан «Савол-жавоб» шартлари бўйича чиқишларини юмор-сатирик саҳна кўринишлари орқали йиғилганлар эътиборига ҳавола этди.

Қизиқарли ўтказилган тадбирда жамоалар бирдек саҳнада ўз маҳоратларини намойиш этиб, ҳазил-мутойиба, топқирлик ва саҳна кўринишлари орқали томошабинлар эътиборини тортишга ҳаракат қилишди.

Танлов якунида Шуманай туманининг «Город Шуманай» ва Нукус шаҳрининг «Нукус сити» жамоалари фахрли биринчи ўринни эгаллади. Иккинчи ўрин Хўжайли туманининг «Хўжалар» ва Нукус шаҳрининг «Вивиан Легенд» жамоаларига берилди. Қонликўл туманининг «Ҳокимнинг муриндиқ болалари» жамоаси учинчи ўринни эгаллади.

Ғолиб жамоаларга ташкилотчилар томонидан тайёрланган махсус диплом, кубоклар топширилиб, пул мукофоти топширилди.

Албатта, бундай ташаббуслар ёшлар қалбида ўзаро ишонч, масъулият ва етакчилик фазилатларини мустаҳкамлашга ҳамда ёшларнинг ижодий салоҳиятини рўёбга чиқариш, ижтимоий фаоллигини ошириш ва эстетик дидини шакллантиришга хизмат қилади.

Қорақалпоғистон ахборот агентлиги