Qanlıkól rayonındaǵı “Jaslar seyili” orayında ótkerilgen “Digirman-shou”da “Qanlıkól rayonı hákimligi kubogi” ushın tańlaw bolıp ótip, oǵan respublikamızdıń rayonlarınan kelgen eń kúshli komandalar qatnastı.

Tańlawdı rayon hákimi B.Sultanov ashıp berdi hám barlıq komandalarǵa áwmet tiledi.
Jarıs dawamında komandalar ózleriniń qızıqlı tamashaları menen jıynalǵanlarǵa kóterińki keypiyat baǵıshladı.
Tańlawda komandalar ózleriniń «Sálemlesiw», «Biatlon», tamashagóyler menen «Soraw juwap» shártleri boyınsha shıǵıwların yumor-satiralıq saxnalıq kórinisler arqalı jıynalǵanlardıń názerine usındı.
Qızıqlı ótkerilgen ilajda komandalar birdey dárejede saxnada óz sheberliklerin kórsetip, házil-kúlki, tapqırlıq hám saxna kórinisleri arqalı tamashagóylerdiń itibarın tartıwǵa háreket etti.
Tańlaw juwmaǵında Shomanay rayonınıń “Gorod Shomanay” hám Nókis qalasınıń “Nukus siti” komandaları sıylı birinshi orındı iyeledi. Ekinshi orın Xojeli rayonınıń «Xojalar» hám Nókis qalasınıń “Vivian Legend” komandalarına berildi. Qanlıkól rayonınıń “Hákimniń murındıq balaları” komandası úshinshi orındı iyeledi.
Jeńimpaz komandalarǵa shólkemlestiriwshiler tárepinen tayarlanǵan arnawlı diplom, kuboklar tapsırılıp, aqshalay sıylıqlandı.
Álbette, bunday baslamalar jaslardıń kewlinde óz-ara isenim, juwapkershilik hám jetekshilik pazıyletlerin bekkemlewge hám jaslardıń dóretiwshilik potencialın júzege shıǵarıw, sociallıq belsendiligin arttırıw hám estetikalıq talǵamın qáliplestiriwge xızmet etedi.

Qaraqalpaqstan xabar agentligi