Кеча АҚШнинг Нью-Йорк шаҳрида БМТ Бош Ассамблеясининг 79-йиллик сессияси доирасида “С5+1” минтақавий дипломатик платформаси шафелигида Ўзбекистон, Қозоғистон, Тожикистон, Туркманистон ва Қирғиз Республикаси ташқи ишлар вазирлари ҳамда АҚШ Давлат котиби ўртасида учрашув бўлиб ўтди.
Унда мамлакатимиз ташқи сиёсат идораси раҳбари Бахтиёр Саидов иқтисодий ҳамкорликни кенгайтириш, барқарор ривожланишни қўллаб-қувватлаш, транспорт-логистика ўзаро боғлиқлигини мустаҳкамлаш, минтақада тинчлик ва фаровонликка кўмаклашиш борасидаги саъй-ҳаракатларнинг аҳамиятини таъкидлади. Шунингдек, экологик ўзгаришлар оқибатларини юмшатиш бўйича биргаликдаги саъй-ҳаракатларга алоҳида эътибор қаратди.
Ўз навбатида, АҚШ Давлат котиби Энтони Блинкен 2023 йил 19 сентябрда бўлиб ўтган “C5+1” давлат раҳбарларининг биринчи саммити якунлари бўйича эришилган келишувларни ҳамда Нью-Йорк декларациясини самарали амалга оширишга содиқлигини билдириб, минерал ресурслар бўйича “C5+1” мулоқотининг АҚШ ва Марказий Осиё бизнес ҳамкорлигини қўллаб-қувватлаш бўйича биринчи “B5+1” форуми ва ногиронлик ҳуқуқлари бўйича “C5+1” махсус сессияси ўтказилаётганлини олқишлади.
Иштирокчилар терроризм, экстремизм, наркотрафик, трансмиллий ва кибержиноятчиликка қарши курашиш ҳамда радикаллашувга қарши курашиш бўйича биргаликдаги саъй-ҳаракатларни янада фаоллаштириш ва мувофиқлаштириш зарурлигига келишиб олдилар.
2025 йилда иштирокчи мамлакатлар “C5+1” формати доирасидаги муваффақиятли ҳамкорликнинг ўн йиллигини нишонлайдилар. Шу муносабат билан томонлар минтақа мамлакатлари ва АҚШнинг глобал масалаларга минтақавий ечимларни излашни давом эттириш, шунингдек, “C5+1” дипломатик платформаси доирасида ҳамкорликни чуқурлаштириш истагини олқишладилар.
ЎзА