Йўл — бу шунчаки икки манзилни боғловчи восита эмас, балки иқтисодиёт томири. У савдо-сотиқни тезлаштиради, ҳудудларни яқинлаштиради, туризм ва хизмат кўрсатиш соҳаларини ривожлантиради. Замонавий ва хавфсиз йўл инфратузилмаси мавжуд бўлмаган жойда тараққиёт суръати секинлашади. Шу маънода, Хоразм вилоятида бошланган Урганч–Хива пуллик автомобиль йўли қурилиши ҳудуд тараққиётида муҳим босқич бўлиши мумкин.

Умумий қиймати 120 миллион долларга тенг бўлган лойиҳа доирасида 35 километрлик замонавий, тўрт полосали автомобиль йўли барпо этилади. Йўл суткасига 20 мингдан ортиқ транспорт воситасини ўтказиш қувватига эга бўлади. Лойиҳа доирасида 17 та кўприк, 8 та йўл ўтказгич, 1 та туннель ҳамда 5 та махсус ўтиш жойи қурилиши режалаштирилган. Қурилиш ишлари халқаро стандартлар асосида олиб борилмоқда.

Бугунги кунда Урганч ва Хива ўртасидаги мавжуд йўлда тирбандликлар сабаб манзилга етиб бориш 45–50 дақиқагача чўзилмоқда. Янги йўл ишга тушгач эса бу вақт 15–20 дақиқагача қисқаради. Бу нафақат қулайлик, балки ҳаракат хавфсизлиги ва логистика самарадорлигини ҳам оширади.

Лойиҳа туризм ривожига ҳам катта туртки беради. Сўнгги йилларда Хоразм вилоятига келаётган хорижий сайёҳлар сони кескин ортган. Замонавий йўл инфратузилмаси эса меҳмонлар оқимини янада кўпайтириш ва хизмат кўрсатиш сифатини оширишга хизмат қилади.

Хулоса қилиб айтганда, Урганч–Хива пуллик автомобиль йўли Хоразмнинг иқтисодий ўсиши, инвестицион жозибадорлиги ва аҳоли фаровонлигини таъминлашга хизмат қиладиган стратегик инфратузилмавий лойиҳа бўлиб хизмат қилади.

Ҳамроз Баянов, ЎзА