Jol – bul tek ǵana eki mánzildi baylanıstırıwshı qural emes, al ekonomikanıń tamırı. Ol sawdanı jedellestiredi, aymaqlardı jaqınlastıradı, turizm hám xızmet kórsetiw tarawların rawajlandıradı. Zamanagóy hám qáwipsiz jol infrastrukturası bolmaǵan jerde rawajlanıw páti tómenleydi. Usı mániste, Xorezm wálayatında baslanǵan Úrgensh-Xiywa tólemli avtomobil jolınıń qurılısı aymaqtıń rawajlanıwında áhmiyetli basqısh bolıwı múmkin.
Ulıwma bahası 120 million dollarǵa teń bolǵan joybar sheńberinde 35 kilometrlik zamanagóy, tórt polosalı avtomobil jolı qurıladı. Jol sutkasına 20 mıńnan aslam transport quralın ótkeriw quwatlılıǵına iye boladı. Joybar sheńberinde 17 kópir, 8 jol ótkel, 1 tunnel hám 5 arnawlı ótiw ornı qurılısı rejelestirilgen. Qurılıs jumısları xalıqaralıq standartlar tiykarında alıp barılmaqta.
Búgingi kúnde Úrgensh hám Xiywa arasındaǵı jolda tıǵılıslar sebepli mánzilge jetip barıw 45-50 minutqa shekem sozılmaqta. Jańa jol iske túskennen keyin bolsa bul waqıt 15-20 minutqa shekem qısqaradı. Bul tek ǵana qolaylıq emes, al háreket qáwipsizligi hám logistika nátiyjeliligin de arttıradı.
Joybar turizmniń rawajlanıwına da úlken túrtki beredi. Sońǵı jılları Xorezm wálayatına kelip atırǵan sırt elli turistlerdiń sanı keskin artqan. Zamanagóy jol infrastrukturası bolsa miymanlar aǵımın jáne de kóbeytiw hám xızmet kórsetiwdiń sapasın arttırıwǵa xızmet etedi.
Juwmaqlap aytqanda, Úrgensh-Xiywa tólemli avtomobil jolı Xorezmniń ekonomikalıq ósiwi, investiciyalıq tartımlılıǵı hám xalıqtıń abadanlıǵın támiyinlewge xızmet etetuǵın strategiyalıq infrastrukturalıq joybar bolıp xızmet etedi.

Hamroz Bayanov,
ÓzAnıń xabarshısı