“Ўзкимёсаноат” АЖ томонидан халқаро ESG рейтингини олиш бўйича изчил ишлар амалга оширилди.

Жамият ахборот хизматининг маълум қилишича, ташкилот “S&P Global” халқаро рейтинг агентлиги билан ҳамкорликни йўлга қўйиб, 2025 йил 17 февралда илк бор ESG рейтингига эга бўлди. Баҳолаш якунларига кўра, компания 29 балл тўплаб, Ўзбекистонда мазкур агентлик томонидан ESG рейтинги берилган биринчи корхона сифатида эътироф этилди.

Барқарор ривожланиш, экологик масъулият ва самарали корпоратив бошқарувни таъминлашга қаратилган тизимли чора-тадбирлар натижасида жорий йилда “Ўзкимёсаноат” АЖ нинг ESG кўрсаткичи 36 баллгача ошди. Бу эса жамиятда корпоратив бошқарувни такомиллаштириш, риск-менежмент тизимини мустаҳкамлаш, ахборот хавфсизлигини таъминлаш ҳамда инсон капиталини самарали бошқариш борасида амалга оширилган ишлар самарасини намоён этди.

Қайд этилишича, эришилган натижалар “Ўзкимёсаноат” АЖда ESG тамойилларини тизимли жорий этиш, шунингдек, халқаро стандартларга мувофиқ фаолият юритишга қаратилган ислоҳотлар изчил давом этаётганини кўрсатади.

Н.Зиёдуллаева,  

ЎзА