АҚШ Президенти «Reuters» агентлигига берган интервьюсида Украина Россия билан тинчлик битими имзолаш жараёнини тўхтатаётганини айтди. Унинг фикрича, Владимир Путин қарийб тўрт йиллик урушни тугатишга тайёр, аммо Зеленский рози эмас.

Трампнинг бу сўзлари Европадаги иттифоқчилари нуқтаи назаридан кескин фарқ қилади. У Путинни ишончли, деб баҳолаб, Киев етакчиси мулоқотда қийинчиликка дуч келаётганини таъкидлади.

АҚШ шафелигидаги музокара урушдан кейин Киевга хавфсизлик кафолатини таъминлашга қаратилган. РФ ва АҚШ Украинани шарқий Донбасс ҳудудини тарк этишга ундаб, Москва билан келишувни тезлаштиришга ҳаракат қилмоқда.

Трамп Давосдаги Жаҳон иқтисодий форуми доирасида Зеленский билан учрашиши мумкинлигини маълум қилган, аммо аниқ режа ҳали йўқлигини билдирган.

Экспертлар фикрича, Америка раҳбари ҳозир эгаллаган позиция Путиннинг дипломатик имкониятини оширади ва Украина бўйича музокарани тезлаштириши мумкин. Киевнинг қатъийлиги эса уруш давом этишига сабаб бўлиши эҳтимоли мавжуд.

Трампнинг изоҳи нафақат сиёсий, балки стратегик қараш сифатида ҳам баҳоланмоқда. Яъни, у дунё эътиборини Украинага, тинчлик музокараси юзасидан чиқариладиган қарорлар марказига қаратаётганига урғу берилмоқда.

Мусулмон Зиё, ЎзА