Саудия Арабистонида ўтказилаётган VI Ислом бирдамлиги ўйинларининг ўн иккинчи куни ҳам Ўзбекистон спорт делегацияси учун муваффақиятли келиб, спортчиларимиз томонидан 1 олтин, 2 кумуш ва 1 бронза медали қўлга киритилди.

Айниқса, улар орасида аёллар кураши бўйича мамлакатимиз терма жамоаси аъзоси Ақтенге Кеунимжаева 50 кг вазн тоифасида барча рақибларини енгиб чиқиб, олтин медаль соҳибига айлангани, барча спорт мухлисларини қувонтирди.

Мусобақанинг дастлабки босқичида жазоирлик Чебила Чеймани 6:1, иккинчи босқичда тунислик Чаҳзаред Аячи ва ярим финалда озарбайжонлик Элнура Маммадовани 10:0 ҳисобида мағлуб этган Актенге чемпионлик учун беллашувда нигериялик Меисиннеи Женезис билан кескин кураш олиб борди.

Қизиқарли кечган беллашувнинг биринчи партиясида ўзини кўрсатган ҳамюртимиз 1:0 ҳисобида ғалаба қозонган бўлса, иккинчи бўлимда нигериялик полвон кескин ҳужумларга ўтиб, 1 очко олишга эришди.

Албатта, бу очко орқали у финал беллашувини ўз фойдасига ҳал қилиши мумкин эди. Буни яхши тушунган Ақтенге беллашув тугашига 1 дақиқа қолганда Мейсиннеи Женезиске қарши кескин усуллар қўллаб, уни йиқитишга эришди ва 4 та тўпни қўлга киритди.

Бундан кейин нигериялик полвон ҳам яна очко олиш учун ҳужумга ўтди. Бироқ, аёллар кураши бўйича юртимиз фахри бўлган Ақтенге Кеунимжаева рақибига имконият бермади ва VI Ислом бирдамлиги ўйинлари чемпионига айланди.

Шунингдек, шу кунги мусобақада машҳур саблячи Муса Айтмуратов ҳам беллашувларга киришиб, дастлабки босқичда эронлик Муҳаммад Фирузободга ютқазиб қўйди.

Мусобақанинг ўн иккинчи кунги баҳсларидан сўнг мамлакатимиз спорт делегацияси 26 та олтин, 30 та кумуш ва 26 та бронза медалини қўлга киритиб, умумжамоа ҳисобида Туркиядан кейин иккинчи ўринни эгаллаб келмоқда.

Адилбай Оразов,

Қорақалпоғистон ахборот агентлиги шарҳловчиси