Ўзбекистон Республикаси Фанлар академияси — йирик илмий-тадқиқот институтлари, лабораториялар ва илмий мактабларни бирлаштирувчи тизим ҳисобланади.

1943 йил 4 ноябрь куни мамлакатимиз илм-фани тарихида муҳим сана сифатида қайд этилган. Айнан шу кунда Ўзбекистон Республикасининг энг йирик ва нуфузли илмий ташкилоти — Ўзбекистон Фанлар академияси ташкил этилган. Бу воқеа республикамиз илм-фанининг мустақил тараққий этишида ҳамда миллий кадрлар мактабини шакллантиришда янги босқични бошлаб берган.

Академиянинг шаклланиши ва дастлабки фаолиятида таниқли олим, математик ва педагог Қори Ниёзий катта хизмат қилган. У ташкилотнинг биринчи президенти этиб сайланган.

Қори Ниёзий раҳбарлигида академия қисқа вақт ичида табиий фанлар, техника, қишлоқ хўжалиги, тарих, филология, санъатшунослик каби йўналишларда илмий-тадқиқот институтларини ташкил этган.

Бугунги кунда Ўзбекистон Республикаси Фанлар академияси олимлари фан ва техниканинг илғор ютуқларини амалиётга жорий этиш, ёш олимларни тайёрлаш ҳамда халқаро илмий ҳамкорликни кенгайтиришда фаол иштирок этиб келмоқда.

Марҳабо Ҳожиакбарова, ЎзА