Қорақалпоғистон Республикаси Жўқорғи Кенгеси Раиси А.Оринбаев Мўйноқ туманида аҳоли турмуш шароитини яхшилаш борасида амалга оширилаётган ишлар билан танишди.

Дастлаб, Жўқорғи Кенгес Раиси Президентимизнинг махсус қарорига асосан, Осиё тараққиёт банкининг 8,2 млн. АҚШ доллари миқдоридаги маблағлари асосида Мўйноқ туманида ичимлик суви таъминотини яхшилашга қаратилган қурилиш ишлари билан танишди.

Шундан сўнг Ўрмон хўжалиги ер майдонлари кўздан кечирилди. Кузги дарахт экишга ерларни ва кўчатларни тайёрлаш, ишларни уюшқоқлик билан олиб бориш бўйича мутасаддиларга топшириқлар берилди. «ARAL AGRO KLUSTER» томонидан иссиқхонада кузги экишга тайёргарлик ишлари ҳам кўриб чиқилиб, шундай олис ва чекка ҳудудлардан бирида ер майдонини даромад манбаига айлантира олиш кўпчиликка намуна бўлиши кераклиги таъкидланди.

Жўқорғи Кенгес Раиси тумандаги Учсой ОФЙ ҳудудида жойлашган газ қудуғи ишлари билан ҳам яқиндан танишди. Шунингдек, Фавқулодда вазиятлар вазирлиги қурилиш батальони ҳарбий хизматчилари билан учрашиб, улар билан яқиндан мулоқот қилди.

Дўстлик МФЙ ҳудудида янгидан ишга туширилган нон цехи ишлари ҳам ўрганилди. Тадбиркорларнинг ўз фаолиятини кенгайтириши учун яқиндан кўмаклашиш, уларни ҳар томонлама қўллаб-қувватлаш бўйича мутасаддиларга аниқ топшириқлар берилди.

Шундан сўнг, фуқароларнинг турмуш шароитини яхшилаш йўналишида ҳали ҳам ечимини кутаётган масалаларни аниқлаш ва муаммоларга ечим топиш бўйича тумандаги кўча оқсоқоллари, нуроний-оқсоқоллар ва кекса аёллар билан учрашув ўтказилди.

Учрашувдан сўнг туман фаоллари, мутасадди раҳбарлар билан биргаликда туманни ижтимоий-иқтисодий ривожлантириш масалалари танқидий кўриб чиқилди.

Қорақалпоғистон ахборот агентлиги