Дональд Трамп Осиё бўйлаб саёҳатининг икки кунини Японияда ўтказади. Кун чиқар мамлакатга ташриф Америка раҳбарининг Осиё бўйлаб ҳафталик сафари рўйхатидаги иккинчи манзил. Токиога етиб келиши биланоқ Трамп Император Нарухито қабулхонасига йўл олди.

Улар илк бор 2019 йил учрашган.

Evronews ёзишича, кейинги муҳим тадбир янги Бош вазир Санаэ Такаити билан учрашув ҳисобланади. Трамп Япония ҳукумати тарихидаги илк аёл етакчи билан шахсан танишишни интиқлик билан кутaётганини маълум қилди.

– Санаэ собиқ Бош вазир, ажойиб инсон Синзо Абэнинг яқин ҳамкори, дўсти сифатида биз билан ҳам яқин, – деди АҚШ раҳбари. – Ишончим комилки, у ҳукумат бошлиғи лавозимида ҳам ўзини яхши намоён қилади!

Маълумотга кўра, Такаити Трамп билан Америка маҳсулотлари хариди ҳажмини ошириш, кемасозлик бўйича ҳамкорлик тўғрисида меморандум имзолашни режалаштирган. Кун тартибидан хавфсизлик масаласи ҳам ўрин олган.

Аввалроқ янги Бош вазир мамлакатнинг Иккинчи жаҳон урушидан кейинги давр учун энг кучли мудофаа тизимини яратиш ниятини эълон қилган эди. Токиодан Сеулга ўтадиган Трамп аввалроқ, мабодо қизиқиш билдирса, Шимолий Корея раҳбарияти билан ҳам учрашишга тайёрлигини айтган.

Кенжа Бекжонов, Улуғбек Тўхтаев (видео), ЎзА