Ўзбекистон Олий Мажлиси Қонунчилик Палатаси Спикери Нуриддин Исмоилов бошчилигидаги мамлакатимиз делегацияси БМТнинг Кибержиноятчиликка қарши кураш конвенциясини имзолаш маросимида иштирок этди, деб ёзмоқда Олий Мажлис Қонунчилик палатасининг телеграм каналида.

Хабарда ёзилишича, Ханой шаҳрида бўлиб ўтган анжуманда БМТ Бош котиби Антониу Гутерриш, Вьетнам Президенти Луонг Куонг, БМТ Бош котиби ўринбосари, Наркотиклар ва жиноятчиликка қарши курашиш бошқармаси ижрочи директори Гада Вали ҳамда 100 дан ортиқ мамлакатдан икки мингга яқин делегат қатнашди.

Ўзбекистон БМТнинг Кибержиноятчиликка қарши кураш Конвенцияси лойиҳасини ишлаб чиқишда ва уни мувофиқлаштириш билан боғлиқ жараённинг барча босқичларида фаол иштирок этган давлатлар қаторига киради.

Олий Мажлис Қонунчилик палатаси Спикери Нуриддин Исмоилов Ўзбекистон Ҳукумати номидан БМТ ҳужжатини имзолади ҳамда Пленар сессиясида нутқ сўзлади.

Маърузада, шунингдек, Ўзбекистон амалга оширилаётган ахборот хавфсизлигини таъминлаш ва кибержиноятларга қарши курашиш бўйича давлат сиёсати ва бу соҳада амалга оширилаётган кенг ислоҳотлар тўғрисида батафсил маълумот берилди.

Қорақалпоғистон ахборот агентлиги