Ózbekstan Oliy Majlisi Nızamshılıq palatasınıń Spikeri Nuriddin Ismoilov basshılıǵındaǵı mámleketimiz delegaciyası BMShtıń Kiberjınayatshılıqqa qarsı gúresiw konvenciyasına qol qoyıw máresiminde qatnastı, dep xabar jazadı Oliy Majlis Nızamshılıq palatasınıń telegram kanalında.

Xabarda jazılıwınsha, Xanoy qalasında bolıp ótken ánjumanǵa BMSh Bas xatkeri Antoniu Guterrish, Vetnam Prezidenti Luong Kuong, BMSh Bas xatkeriniń orınbasarı, Narkotikler hám jınayatshılıqqa qarsı gúresiw basqarmasınıń atqarıwshı direktorı Gada Vali jáne 100 den aslam mámleketten eki mıńǵa shamalas delegat qatnastı.
Ózbekstan BMShtıń Kiberjınayatshılıqqa qarsı gúresiw Konvenciyası joybarın islep shıǵıwda hám onı muwapıqlastırıwǵa baylanıslı processtiń barlıq basqıshlarında belsene qatnasqan mámleketlerdiń qatarına kiredi.
Oliy Majlis Nızamshılıq palatasınıń Spikeri Nuriddin Ismoilov Ózbekstan Húkimeti atınan BMSh hújjetine qol qoydı hám Plenar sessiyada shıǵıp sóyledi.
Bayanatta, sonday-aq, Ózbekstanda ámelge asırılıp atırǵan málimleme qáwipsizligin támiyinlew hám kiberjınayatlarǵa qarsı gúresiw boyınsha mámleketlik siyasat hám bul tarawda ámelge asırılıp atırǵan keń kólemli reformalar haqqında tolıq maǵlıwmat berildi.

Qaraqalpaqstan xabar agentligi