Куни кеча дунё жамоатчилиги, айниқса, санъатсеварлар халқаро миқёсдаги кўнгилсизликка гувоҳ бўлишди. Гап шундаки, яқинда Париждаги машҳур Лувр музейига ўғри тушди. Улар тўққизта заргарлик буюмини, жумладан, француз маликалари ва императорларига тегишли бўлган сирғалар, маржонлар ва тўғнағичларни ўғирлаб кетишга муваффақ бўлган. Талончиликдан кўрилган зарар 88 миллион еврога баҳоланмоқда.

Франция прокуратураси маълумотларига кўра, талончиликни тўрт кишидан иборат гуруҳ бор-йўғи тўрт дақиқа ичида уддалаган. Ўлка ички ишлар вазири Лоран Нунеснинг аниқлик киритишича, ўғрилар музейга лифтга ўрнатилган нарвон ёрдамида дераза орқали киришган.

Кейинроқ, улар скутерларда воқеа жойидан қочиб кетган. Париж полициясининг собиқ мулозимларидан бири ўғрилар воқеа жойини олдиндан кўздан кечирган, деб ҳисоблайди.

Оммавий ахборот воситалари ёзишича, ҳайриятки, музей коллекциясидаги оғирлиги 140 каратдан ортиқ бўлган “Регент” олмоси ўғирланмаган. Ҳуқуқ-тартибот ходимлари жиноятчилар хорижликлар бўлиши мумкинлигини ҳам инкор этмаяпти.

Маълумот ўрнида айтиш жоиз: дунёдаги энг кўп ташриф буюриладиган Лувр музейи 1793 йилда очилган бўлиб, бино илгари қироллик қароргоҳи бўлган.

Шаҳар прокурори Лауре Бекко таъкидлашича, жиноятчилар заргарлик буюмларини эритиб ёки майда бўлакларга бўлишга ҳаракат қилсалар, унинг қийматини қоплаш мушкул. Шу боис, у жиноятчилар фикрини ўзгартириб, қимматбаҳо буюмларга зарар етказмасликка умид билдирмоқда.

“Figaro” газетаси ёзишича, Лувр музейи директори Лоренс Дес Карс мазкур ўғирликдан сўнг истеъфога чиқиши ҳақида ариза берган.

У истеъфога ариза берди, бироқ бу беҳуда. Президент Эммануэль Макрон сўнгги кунларда унга бир неча бор қўнғироқ қилиб, “ўзингизни қўлга олинг”, деган. Музейни таъмирлаш ишлари тўхтаб қолиши ҳақида гап бўлиши мумкин эмас, дейилади мақолада.

Сўнгги маълумотларга қараганда, “Telegram” иловаси асосчиси Павел Дуров ижтимоий тармоқ орқали Луврдан ўғирланган заргарлик буюмларини мамнуният билан сотиб олишини ва уларни Абу-Дабидаги музейга совға қилишини маълум қилган.

Аввалроқ, Дуров Луврдаги талончиликдан ажабланмаганини айтганди. У буни Франциянинг таназзулга учраётганининг яна бир аломати экани, ҳукумат халқни реал таҳдидларга қарши туриш ўрнига хаёлий таҳдидлар билан чалғитаётганини таъкидлаган.

С.Раҳимов, ЎзА