Мамлакатимизда инвестиция сиёсатини тубдан такомиллаштириш ва амалга ошириш жараёнида замонавий, сифатли ёндашув ва механизмларни жорий этиш, шунингдек, инвестиция жараёнини жадаллаштириш ва умуман тадбиркорлик муҳитини яхшилаш бўйича изчил чора-тадбирлар амалга оширилмоқда. Бу чора-тадбирлар иқтисодиёт тармоқлари, ижтимоий ва ишлаб чиқариш инфратузилмасини жадал ривожлантириш ва модернизация қилишга хизмат қилмоқда.

– Инвестиция муҳити яхшилангани, зарур шарт-шароитлар яратилгани натижасида 2025 йилнинг январь-сентябрь ойлари якуни билан республикамизнинг асосий капиталини кўпайтиришга 17612,8 млрд. сўмдан ортиқ инвестиция киритилди, шундан хорижий инвестициялар ва кредитлар 12850,4 млрд. сўмни ёки 1001,3 миллион АҚШ долларини ташкил этди, – дейди Қорақалпоғистон Республикаси Статистика бошқармаси Инвестиция ва қурилиш статистикаси бўлими бошлиғи Саламат Мухаматдинов.

Қорақалпоғистон Республикасига асосий капиталга киритилган инвестицияларнинг 5 699,5 млрд. сўми тоғ-кон саноатига, 3 978,6 млрд. сўми электр, газ билан таъминлашга, 1723,9 млрд. сўми қайта ишлаш саноатига, 1 151,2 млрд. сўми ташиш ва сақлаш ҳамда 1 111,0 млрд. сўми уй-жой қурилиши фаолияти турларига сарфланган.

2025 йилнинг январь-сентябрь ойларида умумий майдони 669,2 минг кв.м. бўлган 3 689 та уй-жой қуриб топширилган. Шундан 307,3 минг кв.м.лик 1804 та уй-жой қишлоқ жойларига тўғри келади.

Мамлакатимизда аҳоли турмуш даражасини яхшилаш, мавжуд ишлаб чиқаришни техник ва технологик қайта жиҳозлаш, стратегик аҳамиятга эга бўлган тўғридан-тўғри хорижий инвестицияларни ўзлаштириш ва ресурслардан оқилона фойдаланиш борасидаги фаол инвестиция сиёсатини олиб бориш чоралари самарали давом этмоқда.

А.Жийемуратов,

Қорақалпоғистон ахборот агентлиги