Mámleketimizde investiciya siyasatın túpkilikli jetilistiriw hám ámelge asırıw barısında zamanagóy, sapalı jantasıw hám mexanizmlerdi engiziw, sonday-aq investiciya procesin jedellestiriw hám ulıwma isbilermenlik sharayatın jaqsılaw boyınsha úzliksiz ilajlar ámelge asırılmaqta. Bul ilajlar ekonomika tarmaqların, sociallıq hám óndirislik infrastrukturanı jedel rawajlandırıw hám modernizaciyalawǵa xızmet etpekte.

– Investiciya ortalıǵı jaqsılanǵanı, zárúr sharayatlardıń jaratılǵanı nátiyjesinde 2025-jıldıń yanvar-sentyabr aylarınıń juwmaǵı menen respublikamızdıń tiykarǵı kapitalın kóbeytiriwge 17612,8 mlrd. sumnan aslam investiciya kirgizilip, sonnan sırt el investiciyaları hám kreditleri 12850,4 mlrd. sumdı yamasa 1001,3 million AQSh dolların quradı, – deydi Qaraqalpaqstan Respublikası Statistika basqarması Investiciya hám qurılıs statistikası bóliminiń baslıǵı Salamat Muxamatdinov.
Qaraqalpaqstan Respublikasına tiykarǵı kapitalǵa kirgizilgen investiciyalardıń 5 699,5 mlrd. sumı taw-kán sanaatına, 3 978,6 mlrd. sumı elektr, gaz benen támiyinlewge, 1723,9 mlrd. sumı qayta islew sanaatına,
1 151,2 mlrd. sumı tasıw hám saqlaw hám 1 111,0 mlrd. sumı turaq jay qurılısı xızmet túrlerine jumsalǵan.
2025-jıldıń yanvar-sentyabr aylarında ulıwma maydanı 669,2 mıń kv.m. bolǵan 3 689 turaq jay pitkerip tapsırılǵan. Sonnan 307,3 mıń kv.m.lik 1804 turaq jay awıllıq jerlerge tuwra keledi.
Mámleketimizde xalıqtıń turmıs dárejesin jaqsılaw, hárekettegi óndiristi texnikalıq hám texnologiyalıq jaqtan qayta úskenelew, strategiyalıq áhmiyetke iye bolǵan tikkeley sırt el investiciyaların ózlestiriw hám resurslardan durıs paydalanıw barısındaǵı aktiv investiciyalıq siyasattı alıp barıw ilajları nátiyjeli dawam etpekte.

Á.Jiyemuratov,
Qaraqalpaqstan xabar agentligi