НАТО Бош котиби Марк Рютте Россиянинг сув ости кемаси билан боғлиқ воқеага ҳазил аралаш танқидий муносабат билдирди. Унинг сўзларига кўра, “Новороссийск” носоз ҳолатда ва шу боис «руслар ҳозир механик излаб юрибди».

РФ Қора денгиз флоти эса кемада ҳеч қандай техник муаммо йўқлигини таъкидлаган. Жавоб баёнотида дизель-электр сув ости кемаси Франция соҳили яқинида Инглиз канали бўйлаб навигация қоидасига амал қилиш учун сув юзасига чиққан. Бу амалиёт режадаги “флотлар аро транзит” талаби.

Нидерландия мудофаа вазирлиги ва НАТО манбалари эса бошқача маълумот берди. Яъни, кема Шимолий денгизда тортиб кетиляпти.

Рютте Словенияда нутқ сўзлаб, рус ҳарбий-денгиз кучлари заифлашганига кинояли тарзда урғу берди. Шунингдек, Россиянинг Ўрта ер денгизидаги ҳарбий салоҳияти “деярли йўқолиб кетгани”ни айтди.

Бошқа манбалар кемада ёнилғи сизиб чиқиш ҳодисаси юз бергани, натижада портлаш хавфи ошганини даъво қилган.

НАТО Денгиз қўмондонлиги 9 октябрь куни ижтимоий тармоқ орқали Франция денгиз флоти сув юзасида ҳаракатланаётган рус сув ости кемасини кузатаётгани акс этган суратларни тарқатди. Ташкилот “Атлантика ҳудудида доимий ҳушёрлик ва хавфсизликни сақлашга тайёрмиз”, дея баёнот ҳам берган.

Вазирлик ҳам «Новороссийск» кемасини кузатаётган “Яков Гребельский” тортувчи кемасини Шимолий денгиз орқали кузатганини тасдиқлади.

ТАСС маълумотига кўра, 2014 йил хизматга кирган «Новороссийск» Калибр қанотли ракеталар билан жиҳозланган Қора денгиз флоти сув ости кемалари гуруҳига киради.

Мутахассислар фикрича, бу воқеа рус денгиз флоти техник жиҳатдан заифлашгани ва НАТО билан геосиёсий рақобат кескинлашганини яна бир бор кўрсатди.

Мусулмон Зиё, ЎзА