И.В.Савицкий номидаги Қорақалпоғистон давлат санъат музейи коллекциясидан ўрин олган ноёб экспонат бола курта – чақалоқ учун қуроқ усулида тикилган биринчи кўйлак.

Қорақалпоқ маданиятида бола курта алоҳида аҳамиятга эга бўлган. У пахта матодан, қоғозсиз, елка томондан горизонтал тарзда ёқанинг ўрни кесиб тикилган. Этак билан енгларининг учлари қайтариб тикилмаган, чок туширилмаган.

Бола курта тикишда матога алоҳида эътибор қаратилган: мато етти оиладан чақалоққа узоқ ва бахтли умр тилаклари сифатида йиғиб олинган. Бундай қуроқлаб тикиш – оддий безак техникаси бўлиб қолмасдан, халқнинг узоқ йиллик анъаналари намунасидир. Аёллар ўз фарзандига бўлган ишончини, ғамхўрлигини қуроқларда акс эттирган.

Бола куртада ҳар бир ранг ва нақшнинг чуқур маъноси бор: қизил – қувонч ва ҳаёт, қора – ёмонликлардан, тил-кўздан ҳимоя, сариқ – қуёш ва илиқлик, квадрат белгилар – оиланинг мустаҳкамлигини билдирган.

Бу кийим қорақалпоқ халқининг юксак диди, бетакрор санъати ва маънавий бойлигининг ёрқин ифодасидир. Унда эстетика ва ишонч, соддалик ва рамзийлик уйғунлашган. Шунинг учун ҳам бола курта халқимиз ҳунармандчилигининг чинакам дурдонаси, дейиш мумкин.

Қорақалпоғистон ахборот агентлиги