Қорақалпоғистон Республикаси Солиқ бошқармасида Солиқ қўмитаси раиси ўринбосари Улуғбек Саъдуллаев иштирокида шахсий таркиб билан йиғилиш ўтказилди.

Дастлаб бюджет тушумларини таъминлаш, хусусан, 2025 йилнинг IV чорагини самарали якунлаш масаласи муҳокама қилинди.

Ҳар бир солиқ тури бўйича белгиланган прогноз кўрсаткичи ва унинг амалдаги ижроси бирма-бир таҳлил қилинди.

«Корхоналар кесимида» йўналишида самарадорлик кўрсаткичи паст бўлган соҳа ва тармоқ мутасаддилари ҳамда «маҳаллабай» тизимида энг паст натижаларни кўрсатаётган солиқ инспекторлари танқид қилинди.

Солиқ тўловчилар томонидан ортиқча тўланган ёки ортиқча ундирилган солиқ тўловини қисқартириш, ортиқча тўловга йўл қўйган солиқ ходимларига нисбатан белгиланган тартибда интизомий жазо чоралари қўлланилиши эслатилди.

Яширин иқтисодиётни қисқартириш, норасмий ишчи-ходимлар фаолиятини легаллаштириш бўйича ишларни самарали ташкил этиш лозимлиги таъкидланди.

Шунингдек, учрашувда коррупцияга қарши курашиш ва унинг олдини олиш масаласига алоҳида эътибор қаратилди. Коррупция ҳолатларига сабаб бўлаётган омиллар ва уларни бартараф этиш чоралари муҳокама қилинди. Хусусан, ички меҳнат тартиб-қоидаларига риоя қилмаслик, иш самарадорлигининг пасайиши ва тамагирлик каби омиллар барча ҳуқуқбузарликларнинг асоси экани қайд этилди.

Тадбирда коррупциянинг аянчли оқибатлари акс эттирилган видеоролик намойиш этилиб, жамоада соғлом муҳитни шакллантириш ва ўзаро ҳамкорликда ишлаш белгиланган прогноз режасининг бажарилишини таъминлаш билан бир қаторда, коррупцион ҳолатларнинг олдини олиш ҳам муҳим аҳамият касб этиши таъкидланди.

Қорақалпоғистон ахборот агентлиги