Германия Канцлери Фридрих Мерц Россия Президенти Владимир Путин ва Украина етакчиси Владимир Зеленский яқин орада учрашмаса, “тўп яна европаликлар ва америкаликларда қолиши” ва Россия Федерациясига нисбатан санкция кучайтирилишини таъкидлади. Бу фикр Канада Бош вазири Марк Карни иштирокидаги қўшма матбуот анжуманида янграган. Мазкур тадбир трансляцияси Германия ҳукумати саҳифасида намойиш қилинган.

– Биргаликда икки ҳафта ичида Зеленский ва Путин учрашишига умид билдирдик. Ушбу учрашув, келишиб олинганидек, тезроқ ўтказилмаса, тўп яна бизда қолади европаликлар ва америкаликларни назарда тутяпман. Кейин бу борада яна маслаҳатлашамиз. Агар Россия томони мулоқот жойига бормаса, янада кўпроқ босим талаб этилади. Европа Иттифоқи кейинги санкция режасини тузяпти. Америка Президенти ҳам қўшимча жазо божи жорий этилишини истисно қилмади. Европа ва Қўшма Штатлар Украина билан бирга эҳтимолий хавфсизлик кафолатини ишлаб чиқмоқда. Биринчи мақсад – Украина армиясининг узоқ муддат мамлакатни ҳимоя қила олишини таъминлаш.

Эслатиб ўтамиз, ўтган ҳафта Трамп Оқ уйда Зеленский ва Европа Иттифоқи етакчиларини қабул қилди. Аввалроқ у Путин ва Зеленский билан уч томонлама учрашув ўтказиш имконияти мазкур музокара муваффақиятига боғлиқлигини истисно этмаганди.

С.Раҳимов, ЎзА