АҚШ Президенти Дональд Трамп томонидан жорий қилинган шаҳарлардаги жиноятчиликка қарши кураш чораси шароитида пойтахт Вашингтонда ноқонуний муҳожирларни ҳибсга олиш ҳолати ўн баробар ошди. Бу ҳақда CNN махсус таҳлилга таяниб хабар тарқатди.

— 7 августдан бери федерал агентлар Колумбия округида қонуний иммиграция мақомига эга бўлмаган 300 кишини қўлга олди. Бу одатий кўрсаткичдан ўн карра юқори, — дейилган телеканал ахборотида.

Қайд этилишича, Трамп янги муддатининг дастлабки олти ойида иммиграция хизмати ходимлари пойтахтда ҳафтасига ўртача 12 нафар муҳожирни ушлаган.

Аввалроқ етакчи федерал ҳокимият идораларининг Вашингтонда жиноятчиликка қарши курашишга қаратилган қатор қарорларини эълон қилган. Жумладан, ўз фармони билан шаҳар полициясини бевосита федерал ҳукумат назоратига ўтказди. Бундан ташқари пойтахтга Миллий гвардияни юборган ва лозим бўлса, қуролли кучлар ҳам киритилиши билан таҳдид қилган.

Айрим оммавий ахборот воситаларида бундай хатти-ҳаракат маҳаллий аҳоли норозилигига сабаб бўлаётгани айтилмоқда.

Дарвоқе, 20 январь – инаугурация куни Дональд Трамп АҚШнинг 47-президенти сифатидаги биринчи нутқида ноқонуний муҳожирлар Америка ҳудудига кириб келишини зудлик билан тўхтатиш, миллионлаб мигрантларни мамлакатдан чиқариб юбориш жараёнини бошлашга ваъда берган. Шунингдек, мамлакат жанубий чегарасидаги вазият муносабати билан миллий фавқулодда ҳолат эълон қилган.

С.Раҳимов, ЎзА