Шу кунларда Ўзбекистон Республикаси инвестициялар, саноат ва савдо вазири Лазиз Қудратов бошчилигидаги делегация Иордания Ҳошимийлар Қироллигида расмий ташриф билан бўлиб турибди. Сафар доирасида қатор учрашув ва музокаралар олиб борилмоқда. Жумладан, ушбу араб мамлакати инвестиция вазири доктор Ториқ Абу Ғазолий билан кечган учрашувда ҳамкорликни кенгайтириш истиқболи муҳокама қилиниб, тўғридан-тўғри хорижий сармоя жалб этиш ҳамда қулай бизнес муҳити яратиш бўйича тажриба алмашилди.

Иордания саноат, савдо ва таъминот вазири Ёруб Қудаҳ билан ҳам самарали учрашув ташкил этилиб, савдо ҳажмини ошириш, икки мамлакат ишбилармон доиралари ўртасида бевосита алоқа йўлга қўйиш масаласи кўриб чиқилди. Саноат кооперацияси ва экспортни қўллаб-қувватлаш бўйича маҳорат алмашинувига алоҳида эътибор қаратилди. Мулоқотнинг асосий натижаси сифатида ўзаро Имтиёзли савдо тўғрисидаги битим лойиҳасини тайёрлашга келишиб олинди.

Дастурга мувофиқ, мезбон мулозимлар — рақамли иқтисодиёт ва тадбиркорлик вазири Сами Сумайрат, Қирол Ҳусайн номидаги бизнес боғи бош директори Умар Изиддин, Саноат палатаси раиси муҳандис Фатҳий Жагбир, шунингдек мамлакатнинг етакчи компаниялари —  «National Arab Mining», «Zarhat», «Arab Pesticides and Veterinary Drugs Manufacturing», «Jordan Phosphate Mines», «Grow Tech», «Classic Fashion Apparel Industry» каби корхоналар раҳбарлари билан ҳам музокара ўтказилди.

Кун якунида Иордания Савдо-саноат палатаси раҳбарияти ҳамда фармацевтика, кимё, тўқимачилик, электротехника, озиқ-овқат маҳсулотлари соҳаларида фаолият юритувчи 20 дан зиёд жамоа иштирокида давра суҳбати бўлиб ўтди. Ушбу давлат ишбилармон доиралари республикамиз инвестиция муҳитига доир амалий жиҳатлар билан батафсил таништирилди. Истиқболли тайёр лойиҳалар таклиф этилди, шерикликнинг аниқ йўналишлари келишиб олинди.

Г.Сатторова, ЎзА