Давлат департаменти эълон қилган ҳужжатига кўра, Қўшма Штатлар Америкага келган чет элликлар кейин мамлакат ҳудудидан чиқиб кетиши учун хавфсизлик чораси сифатида ҳар бир аризачига 5000 дан 15 000 долларгача гаров эвазига виза бериш синов дастурини ишга туширмоқда.

– Давлат департаменти виза облигацияларини тақдим этиш бўйича 12 ойлик синов дастури бошланганини эълон қилади, – дейилган давлат реестрига жойлаштирилган қарорда. – Консуллик ходимлари виза бериш шарти сифатида ноиммиграцион визага мурожаат этувчилардан 15 000 долларгача қийматга эга облигация жойлаштиришни талаб қилиши мумкин.

Бундай облигация мамлакатга бизнес ёки сайёҳлик учун кирганда бериладиган B-1 ва B-2 визасига мурожаат қилишда ундирилиши мумкин. Ушбу тартиб виза муддатини кечиктириш ҳолати кўп кузатиладиган давлатлардан келган хорижликлар учун қўлланади.

Ҳужжатда мамлакатлар рўйхати келтирилмаган.

Таъкидланганидек, гаров эвазига виза бериш синов дастури 2026 йил августигача ишлайди. Қарор матнига кўра, гаровнинг аниқ миқдори консуллик ходими томонидан белгиланади. У аризани кўриб чиқиш асосида 5 000, 10 000 ёки 15 000 доллар жойлаштирилишини талаб қилиш ҳуқуқига эга бўлади.

С.Раҳимов, ЎзА