Таиланднинг Бангкок шаҳрида бокс бўйича давом этаётган Осиё чемпионати доирасида Asian Boxing ташкилотининг навбатдаги конгресс йиғилиши бўлиб ўтди.

Конгресс давомида Осиё қитъаси боксининг келажакдаги режалари кўриб чиқилди. Ушбу ташкилот раҳбариятига номзодларга овоз бериш жараёнида Asian Boxing ташкилотининг амалдаги раҳбари таиландлик Пичай Чунхаважира қайта раҳбарликка сайланди.

Ташкилотнинг вице-президентлиги лавозимига Қозоғистон, Япония, Филиппин вакиллари ва Ўзбекистон бокс федерацияси раисининг биринчи ўринбосари Сакен Полатов номзодлари қўйилган эди.

Делегатларнинг овоз бериш натижасига кўра, ҳамюртимиз Ўзбекистон бокс федерацияси раисининг биринчи ўринбосари Сакен Полатов Asian Boxing ташкилотининг вице-президенти этиб сайланди.

Эслатиб ўтамиз, Таиланднинг Бангкок шаҳрида 22 ёшгача бўлган боксчилар ва ёшлар ўртасида ташкил этилаётган қитъа чемпионатида 38 нафар ўзбекистонлик ёш чарм қўлқоп усталари жанг олиб бормоқда.

Чемпионат 12 августга қадар давом этади.

Т.Рўзиев, ЎзА