Инсон бахти нимада деб ўйлайсиз? Бу саволга ҳар ким ҳар хил жавоб бериши мумкин. Лекин, гапнинг мағзини чақиб, босиб ўтган умр йўллари билан кўз олдимиздаги тақдирларга кўз югуртирганимизда бахт инсон учун унинг соғлиғи, оиласининг саломатлиги билан ҳамжиҳатлигида эканлигининг гувоҳи бўламиз. Демак, бахт ё миллатда, ё бойликда эмас. Тинч-тотув оилани тиклашда эса бир-бирини тушуниб яшаш ва ҳурмат-иззатни сақлаш энг асосий инсоний фазилатлар ҳисобланади.

Ҳаётнинг ўйдим-чуқур, баланд йўллари билан турмуш қийинчиликларини эртароқ бошдан кечирган Ойимхон учун ҳаёт йўллари кореялик тадбиркор Ли Инжаэни учратганидан сўнг туб бурилиш билан яхши томонга бурилди.

Бугун эслагиси ҳам келмайдиган ўша йиллар ўтмиш бўлиб ортда қолди-да, тили, дини бошқа бўлса-да ўртадаги меҳр-муҳаббат билан ҳурмат-иззатга қурилган оилада уларнинг бахтли турмуши бошланди. Улар учун орада бир-бирининг тилини тушуниш кўнгил, қалб, юрак орқали бўлди. Бугун эса улар беш фарзанднинг бахтли ота-оналарига айланиб, қўш уруғни тенг тортиб келаётган халқлар дўстлигига қурилган оиланинг қўш уруғи…

Аллоҳ таоло ўз бандасига кўтара олмайдиган даражада синов бермайди дейди аслида. Баъзида шундай синовлар, машаққатлар бўладики, табиатан нозик бўлиб яратилган аёл кишилар учун оғир келиб, белини букиб, тақдир синовларида кучли бўлсанг енгиб, ожиз бўлсанг «синиб» кетишинг ҳам мумкин. Лекин, Ойимхон Сапарова ўзининг бошига тушган қийинчиликларни мардона енгиб чиққан аёл бўлди. Бугун боласининг ҳам, ўзининг ҳам касал бўлганларини эслаб, лекин ёруғ кунларга етишишни Аллоҳ таолонинг қўллаши ва умр йўлини яхши инсон билан боғлаганида деб шукр қилади.

Асли Кореянинг Сеул шаҳрида яшайдиган Ли Инжаэ бир неча йиллардан буён шу юрт фарзандига айланиб қолди десак адашмаймиз. Серқуёш Ўзбекистонда у бизнесини йўлга қўйиши билан бирга қорақалпоқ қизи Ойимхон билан турмуш қуриб, бахтини ҳам топган омадли йигит бўлди. Мутахассислиги технолог бўлган у хорижий инвестиция киритиб, Нукус туманидан иккита, Қўнғиротдан ва Кегейлидан қизилмия илдизини қайта ишлаш ва ярим тайёр маҳсулотни хорижга экспорт қилиш билан шуғулланиб келмоқда. Яъни, оилавий бизнесни йўлга қўйиб, ҳозирги вақтда жами 250 дан ортиқ кишини иш билан таъминлашга эришган. Бугун уларнинг беш нафар фарзанди ўзлари ўйлагандек яхши тарбия натижасида жамиятда ўз ўрнини топган фарзандлар бўлиб вояга етди.

– Ҳар қандай ютуққа меҳнат, билим ва ақл билан эришилади, – дейди Ойимхон биз билан суҳбатда. Ҳар қандай ютуқ ортида меҳнат бўлгани каби, қизилмия илдизини экиш, йиғиш ва уни ярим тайёр ҳолда экспортга чиқариш ҳам осон эмас. Буларнинг барчаси турмуш ўртоғимнинг меҳнатсеварлиги натижасида бўлмоқда. Эрим Ли ўзи технолог бўлгани учун қизилмия илдизини стандартлаштиришда яхши натижаларга эришмоқда. Шунингдек, ярим тайёр маҳсулотларни Хитой ва Корея давлатига экспорт қилмоқдамиз.

Кореяда женьшень кўплаб касалликларга даво сифатида фармацевтикада кенг қўлланилса, бизнинг заминимизда ўсадиган бўёқ ҳам фармацевтикада, косметикада, қандолатчиликда кенг қўлланиладиган ўсимлик ҳисобланади. Бу ёввойи ўсимликни йиғиб олиб, уни қайта ишлаб экспортга чиқариш билан бирга юртимизда ҳам фойдали доривор ўсимлик сифатида фойдаланиш кенг тус олмоқда. Мана, шу соҳага қизиқиб, бир неча йиллардан бери ўз бизнесини йўлга қўйиб келаётган, Ойимхон билан Ли Инжаэ бу доривор ўсимликни хонадонида ҳам бор.

Уларнинг икки фарзанди бугун ёнида оилавий бизнес юритаётган бўлса, бир қизи IT соҳасида, икки қизи Кореяда ишламоқда. Бир қизи Қозоғистон Республикасига рус миллатидаги йигитга турмушга чиққан. Улар ўртасида меҳр-муҳаббат, ҳамжиҳатлик туйғуларини сақлаб ўтирадиган ота-она доимо икки мамлакатнинг анъаналари, урф-одатларини ҳурмат қилишини уқтиради. Нукус тумани Шўртанбой қишлоғида яшаётган уларнинг хонадонига борганимизда биз ажойиб бир манзаранинг гувоҳи бўлдик. Яъни, эгилиб салом бериб, қўлимиздан қумғон билан сув олиб, бир қўлидаги сочиғини узатиб, қуюқ қора чойни секин пиёлаларга қуйиб бизга узатган келинни ҳеч қандай корейс деб ўйламадик. У ҳақиқий қорақалпоқ қизи сингари эди.

-Келиним маҳаллий корейс аёл. Яқинда набирамизга тушов кесиш тўй бериб, унда икки элнинг анъанасини қилиб, халқлар дўстлиги тўйини ўтказдик. Тўйда қорақалпоқ ва корейс халқларининг қўшиқлари янгради. Ота-онам Кореяда бўлгани учун кела олмади. Лекин, бизлар уларни кўришга бориб турамиз. Тўйга қайин отам менга корея аёлларининг миллий кийимини олиб бериб юборибди. Улар тўйни онлайн кўриб қувониб қолишди ва мендек қорақалпоқ келини бўлганига кўнгли тўлиб миннатдор бўлишди, – дейди Ойимхон.

Шу тўйдан кейин улар қудасининг уйига элқаъда тўйига бориб қайтди. Яъни Корейс оиласида эл урф-одат тўй бўлиб, қорақалпоқ халқининг урф-одат анъаналари ўтказилди.

Лиди Ўзбекистонда яшаб, тадбиркорлик билан шуғулланаётганига 25 йил бўлиб қолган. У бир куни Кореяга кетганида Ойимхонга қўнғироқ қилади. Шунда:

-Мен бир ҳафтага келган эдим. Лекин, мен икки кун бўлмай туриб, сизларни соғиниб турибман. Мен Ўзбекистонга ўрганиб кетган эканман. Билетимни ўзгартириб эртага изимга қайтмоқчиман,-дейди ва эртасига изга қайтади.

Тадбиркорларга кенг йўл очилиб, уларга имтиёзлар бериб, қўллаб-қувватлаётган Президентимизга миннатдорчилиги чексиз бўлган Ли ва Оймихон ўзлари раҳбарлик қилаётган ишлаб чиқариш корхоналарида асосан кам таъминланган оилаларни, жумладан, хотин-қизларни иш билан таъминлашга алоҳида эътибор қаратган. Шунингдек, улар кам таъминланган оилаларга ёрдам қўлини чўзиш билан бирга спорт мусобақаларига ҳомийлик қилиб келмоқда. Шунингдек, улар бир неча бор фаол тадбиркор сифатида меҳнатлари эътироф этилиб, тегишли идоралар томонидан Фахрий ёрлиқлар билан тақдирланган.

«Мен ўз элимни ташлаб кетмайман. Кўнсангиз шу юртда турмуш қуриб, бирга яшайман. Ўзбекистондек, Қорақалпоғистондек тинч ва бахтли эл дунёда йўқ,» деб шарт қўйган Ойимхон бугун кореялик йигит билан ўз бахтини топган қорақалпоқ қизи.

-Бахт тинч-тотув оилада. Бойликда эмас, оғизбирчиликда,-деб жилмайиб набирасини бағрига босган қиёфаси унинг ўз ҳаётидан рози бўлиб, шукронасини билдириб турар эди. Халыклар дослығы мангу бўлсин» деган чиройли сўзлар билан якунламоқчимиз.

Гулнора Турдишова,

Қорақалпоғистон ахборот агентлиги.